خوەینشاندەرەیل رییگ ستراتیژی لە دیالە بڕن لە ناڕەزایی لەبان پێشنیار عامری.. ڤیدیۆ
تا ئیسە ئەنجومەن پارێزگای دیالە نەتوەنست دانیشتن یەکەمی ئەنجام بەێد ئەرا یەکلاوەکردن پۆست سەرۆک ئەنجومەن و پارێزگار لەوەر ناکۆکی ناوەین فراکسیۆنەیل سەرکەفتگ لە هەڵوژاردن کۆتایی ساڵ ٢٠٢٣ لە عراق.
پەیامنێر ئاژانس شەفەق نیوز وت: شمارەیگ لە هاووڵاتیەیل خەڵک موقدادیە دەرچگنە خوەینشاندان و چادر هەڵدان ئەرا مانگگردن لەبان ری بەعقووبە- موقدادیە - خانەقین نزیک چواڕیان برشتە وری گشتی بڕین.
وتیش؛ خوەینشاندەرەیل رازی لە کاندید هادی عامری ئەرا پۆست پارێزگار نیین، و داوا کەن پۆستەگە ئەرا پارێزگار وەرین موسەنا تمیمی نووەو بکەن.
پەیامنێر ئاژانسمان وتیش: خوەینشاندانیگ ترەک ئەرا لایەنگرەیل پارێزگار وەرین موسەنا تمیمی لە قەزای بەلەدروز هەڵسیا وەداوای نووەوکردن پۆستەگە ئەرای، و رەتکردن پێشنیارەگەی عامری، و ریەگە بڕین و تایەر سزانن و چادر لەبان ئەو ریە هەڵدان.
هادی عامری، دویەکە ئیوارە کاندیدکردن محمد جاسم عومەیری کوڕ سەرۆک دادگای فیدراڵی باڵا لە عراق راگەیان جویر کاندید یەکلاوەکردن ئەرا شوین پارێزگار وەرین موسەنا تمیمی.
