"خشتەی سوور" چەوەڕی عراق کەێد و هوشداری پلەیل پەنجابی نیمەڕوان
شەفەق نيوز/ دەسەی کەشناسی عراق، ئمڕوو جمعە، راگەیان کە لە فرەی شارەیل عراق و بەرزەوبوین وەرچەویگ لە پلەی گەرمی توومار کرد، لە وەختیگ پارێزگای زیقار لە نوای لیستەگە بوی وە توومارکردن 50 پلەی سەدی، لە نشانەیگ ئاشکرا ئەرا رەسین وە لویتکەی ئی گەرمی سەختە لە وڵاتەگە.
دەسەگە لە بەیاننامەیگ رەسیە ئاژانس شەفەق نیوز وت: مەزەنە کریەێد لە فرەی شارەیل باشوور وڵات، سوو شەممە، پلەی گەرمی پەنجایی توومار بکریەێد، و کەمیگ خوارتر لەو ناوچەیل، و تا رووژ یەکشەممەیش وەیجویرە وەردەوام بوود، وەگەرد داوەزیان پلەی گەرمی لە رووژ دووشەممەو، لە شارەیل ناوڕاس و باکوور دەسوەپی کەێد، و کەمکەم داوەزێد.
وتیش: مەزەنە کریەێد لە رووژ سێشەممەوو ئەو داوەزیانە شارەیل باشوور بگرێدەو، و تەواوبوین کەمکەم ئەرا لویتکەی شەپوول گەرمیەگە، و هوشداری لە مەنین ژیر خوەر لە مەوقەی نیمەڕوان دا، لەوەر تویشهاتن وە لەهووشچگن و شەکەتی.
