خانمە باڵیۆز ئەمریکا لەباوەت ئاڵشتکردن حکومڕانی لە عراق: لە گەل ئەو پرسیارە بکەن
بەیش لە چەوپیکەفتنیگ هات ک ئاژانس شەفەق ئەنجامی دا.
لەباوەت دزەکردن و شیکارییەیلیگ باس لەوە کەن ک ساڵ ٢٠٢٣ بوودە سەرەتای ئاڵشتکاری لە سیستم حکومەت لە عراق، یا لەلای کەمەو ئاڵشتکاری لە هەیکەل ئیسەی حکومەت؟
خانمە باڵیۆز لە وەڵامەگەی وت: یە پرسیاریگە ئەرا عراقییەیل، هویر من لەبان فراوانکردن ڕێککەفتن چوارچیوەی ستراتیژی ناوەین ئەمریکا و عراقە لە ساڵ ٢٠٠٨ ک لە ئاسایش رەد کەێد وەروو پەیوەندییگ هەمەلایەنە ک گەل عراق ئەرا ئەنجام بڕەسنێد، ئەمریکا وەردەوام بوود لە هاوبەشیکردن وەرد حکومەت عراق ئەرا فراوانکردن هاوکاریمان لەبان ئامانجە هاوبەشەیل، ئەوانیش: چەسپیان سەروەخوەیی وزە لە عراق، گەشەکردن کەرت تایبەت، خاسترکردن ئاست خزمەتگوزارییەیل گشتی، فراوانکردن پەیوەندیەیل ناوەین هەردوگ گەل، نواگیری گەندەڵی، نواگیری قەیران کەشوهەوا، و بەرزکردن ئاسایش و ئارامی و سەروەری عراق.
رۆمانۆڤسکی وتیش: لەناو گردەوبوین دەسەی باڵای هەماهەنگی ئابووری ک سەرەتای ئمساڵ لە واشنتۆن پایتەخت وەڕیەو چگ، فوئاد حسێن وەزیر دەرەوە و راوێژکارەیل سودانی سەرۆک وەزیرەیل پلانیگ دانان ئەرا هەمەرەنگکردن ئابووری عراق لەجیای پشتبەسانی وە داهات نەفت و فەرمانبەری لە کەرت گشتی وەرەو گەشەپیدان وڵات وە شیوەیگ گورج، و باس لە ئەگەر پشتگردن ئەمریکا ئەرا تەقەلایل عراق کردیمن تا خوەیبژی وەدەس بارێد و وزە و سەرچەوەی جیگر ئەرا وزە لە ناوەین هاوسایل دروس بکەێد.
هەمیش وت: "کار من سەرکردایەتی هەوڵەیل باڵیۆزخانە بکەم ئەرا نووڕین وەرەو نوا و گەردین لەشوین دەرفەتەیل ک بتوەنیمن ئمڕوو هاوبەشی وەرد عراق و گەل عراق دروس بکەیمن. عراق وەرەو ئاڵشتبوین چوود و من گەشبینم وە بانان هاوبەشمان."
