خانمە باڵیۆز ئەمریکا ئەرا شەفەق نیوز ئاشکرای هوکارەیل بەرزەوبوین دۆلار کەێد

خانمە باڵیۆز ئەمریکا ئەرا شەفەق نیوز ئاشکرای هوکارەیل بەرزەوبوین دۆلار کەێد
2023-06-06T20:52:26+00:00
شەفەق نیوز/ ئەلینا ڕۆمانۆڤسکی باڵیۆز ئەمریکا لە عراق، ئەو لایەنەیلە تۆمەتبار کرد ک وە "گەندەڵ" باسیان کرد، ک هانە پشت بەرزبوین نرخ دۆلار وەرانوەر دینار لە بازاڕ.

یەیش لە چەوپیکەفتنیگ هات ک ئاژانس شەفەق نیوز ئەنجامی دا.

پرسیار لە باڵیۆزەگە کریا لەباوەت  قەیران بەرزەبوین نرخ ئاڵشتکردن و گلەوخواردنی ئەرا رزبەندی، ک وەرجەیە ئیوە باس ئەوە کردینە ک ئەمریکا هویچ پەیوەندییگ وەی باوەتە نەیرێد، ئایا توەنین وەشیوەیگ هویردەتر لە هوکارەیل قەیرانەگە دیاری بکەین، و ئایا نووڕیندان لە رەوش دارایی عراق چەس؟

باڵیۆزەگە وت: "ئی باوەتە وە قەیران باسی نیەکەم، وەئاشکرا ئەوە خستنە وەرچەو ک ئیمە کۆنترۆڵ نرخ دۆلار وەدەسمان نییە، و ئەمریکا هویچ پەیوەندییگ وەی باوەتە نەیرێد، خاسترە باسی وە کاریگەری لاوەکی ئابوورییگ بکریەێد ک لە مامەڵە لە بنەمای گەردین پویل دویر کەفێد."

 ڕۆمانۆڤسکی پاڵپشتی ئەمریکا ئەرا تەقەلایل حکومەت عراق و بانک ناوەندی عراق ئەرا نواگیری گەندەڵی و چەرمککردن پویل نووەو کرد، هاتێ  لەو سنووردارکردنە لەبان ئی رەفتارەیلە گەشەی خاسیگ کرد، بویە مدوو پیشکەفتن خاسیگ لە کەرت بانکی عراق، تا زیاتر وەکارهاورەیل لەلایەن بازرگانانی بانک و دامەزریاگە داراییەیل گلەو بخوەێد، یەیش دەسمیەتی لە کەمکردن جیاوازی ناوەین نرخ فەرمی و نافەرمی دەێد.

رۆمانۆڤیسکی وتیش: بەشیگ لە کۆمپانیا و قەوارە گەندەڵەیل وەرجەیە بەڵگەنامەی ساختە وەکار هاوردن و داواکارییان گردەو کردن ئەرا دەرکردن پویل وەرەو دەیشت وڵات، ئیرنگە ک ری چالاکییان سنووردار کریا، ئەو کۆمپانیایلە ک خوازن دەسیان بڕەسێدە رێژەی فەرمی دۆلار  ئەرە دابینکردنی دارایی هاوردەکردن، بایەتە  هەژمار بانکی و مووڵەت گونجیاگ لە وەزارەت بازرگانی بیاشتان. 

وتیش: "لایەنە گەندەڵەیل ک دۆلار گردەو کەن تا بانوخوار وە بازاڕ بکەن، و ئەو کۆمپانیایلە ک وەردەوامن لە هاوردەکردن کاڵا وەبی مووڵەت وە کاش یا کەناڵە نافەرمیەیل زوور تیەرنە بام نرخ ئاڵشتکردن هاوتەریب، لەوەر ئەوە، ئیمە گاڵ گشتی دەیمن ک مامەڵە لە چوارچیوەی کەرت بانکی فەرمی بکەن و داوا لەبان بازاڕەیل پویل کەمەو بکەن.

Shafaq Live
Shafaq Live