خانەقین نوقڵانەی ناڕەزاییگ لەدەس کارەبا دەێد
شەفەق نیوز/ خەڵک قەزای خانەقین، ئمڕوو دووشەممە، نوقڵانەی رێکخستن خوەینشاندان ناڕەزایی لەوەر بەدی وزەی کارەبا وداوەزین بەشەوکردنی وگرفت موەلیدەیل دان.
سەلام عەبدولڵا ئەندام دەسەی "کار هەرەوەزی لەپیناو خانەقین" ئەرا ئاژانس شەفەق نیوز وت: قەیران کارەبا لە خانەقین زیایەو بوود، لە لایەن بەشەوکردن و کار موەلیدەیل تایبەت، و موەلیدەیلیگ هەس پاڵپشتی وە سوتەمەنی لەلایەن حکومەت نەکریانە، ک گرفت ئەرا ناوچەیل فەویگ پەیا کرد، وەبی هویچ چارەیگ.
دووپات کرد ک تەگبیر دەرچگن وە خوەینشاندان هەس، باوجی هیمان یەکەو نەگردنە تا ناڕەزاییەگە وەشیوەیگ ڕێک بخریەێد ک چارەیل داواکریاگ مسۆگەر بکەێد، وتیش: بەشەوکردن کارەبا چ لە سیستەم نیشتمانی یا لە موەلدەیل تایبەت هیمان هەڕمەکیە ورێک نییە، و وسیان راسییگ لەلایەن ئیدارەی خانەقین و لایەنەیل پەیوەندیدار خوازێد.
راگەیانکار ئەمیر خانەقینی، ئەرا ئاژانس شەفەق نیوز دیاری کرد ک ساعەتەیل بەشەوکردن کارەبا لە خانەقین ها ناونی ١٤ تا ١٦ ساعەت لە رووژیگ، وهەر ناوچەیگ وە جویریگە لەوەر بڕیگ هووکار جویر پەککەفتن یا بار زیایە.
خانەقینی وتیش: لە گرفتەیل خەڵک خانەقین لەلایەن کارەبا ئەوەسە ک کارەباگە چڕوپڕە و ڕێک نییە، وهیشت ئامێرەیل ماڵەیل لە فرەی ناوچەیل خانەقین پەکیان بکەفێد، و کار مەردم لە کەرت تایبەت وسیا، چوینکە کارەباگە گونجیاگ نییە.
وەگەرد ئەوەیش، خەڵک ئاوایەیل قوڵە لە دەورگرد خانەقین داوا لە ئیدارەی قەزاگە و وەڕیەوبەرایەتی کارەبا کردن رزگاریان لەی مردن یەواشیە بکەن لەژیر مژ ئی تاوسان سویەرە و بەرزەوبوین پلەی گەرما.
بڕیگ لە خەڵک خانەقین ئەرا ئاژانس شەفەق نیوز دووپات کەن ک زیاتر لە ٢٥ ئاوای زیان لە قەیران کارەبا دیرن، ک زیاتر لە ٢٠ هەزار کەس خستە ژیر مردن یەواشی وە سوزیان.
و داوا لە لایەنەیل پەیوەندیدار کردن رزگاریان بکەن و چارەیلیگ مرۆیی دانەن هەکاتی ناوچەیل پارێزگاگە و رێکبوین کارەباگە مسۆگەر بکەن، وتنیش: واز لە خزمەتگوزاری هاوردیمن وتەنیا کارەبا توایمن.
