حکومەت عراق مدووەیل کەمی تەڵا لە یەدەگەیلی وەرانوەر دراوەیل ترەک ئاشکرا کەێد
شەفەق نیوز/ مەزهەر محمد ساڵح، سڵاکار دارایی سەرۆکوەزیرەیل، ئمڕوو چوارشەممە، مدووەیل کەمی تەڵا لە یەدەگ دەوڵەت وەرانەور ئەو دراوە گرانەیل ئاشکرا کرد.
ساڵح لە چەوپیکەفتنیگ وەرد ئاژانس شەفەق نیوز وت: “چەن وڵاتیگ هیمان تەنیا بڕ کەمیگ تەڵا جویر بەشیگ لە یەدەگ نەختینەیی خوەیان هالایان، کە ئمڕوو فرەترین گرنگیدان وە سەروەت و سامان ترەکە کە توەنێد وەزوی بوودە سەروەت و سامان بەرهەمدار کە قازانج لەلی بوود.”
وتیش: وڵاتەیل لە وەکارهاوردن تەڵا جویر ئەمار سەرەکی یەدەگ نەختینەی خوەیان دویر کەفن، یەیش لەوەر چەن مدوویگ لە پیشهاتە ئابوورییە ناودەوڵەتییەیل و ئاڵشتکاری لە سروشت سیستمە داراییە مۆدێرنەیل، کە لەوەر ئەوە سنووردار کریان، لەوانەیش داهات کەم بەراورد وە داهاتەیلیان ئەرت سەروەت و سامانەیل ترەک جویر: بەرهەمهاوردن لە پویلدانان، یا چەک حکومەت کە رزبەندی قەرزیگ فرە بەرز دیرن و بیوەیە، ئەراوە تەڵا داهاتیگ جویر ئەوە ئەرا حکومەت وەدەس نیارێد."
ساڵح وتیش: ئەراوە فرەی وڵاتەیل ئەرایان خاسە ئەو سەروەت و سامانانە بیلن کە داهاتیگ جیگیر و بیوەی دروس کەن، جزیر: چەک خەزێنەی ئەمریکی یا ئەوروپی کە وەڕاسی توەنن سوود ساڵانە وەدەس بارن، هەمیش سەختی مامەڵەکردن وەرد تەڵا لە قەیرانەیل، چوینکە ئاڵشتکردن تەڵا وەزوی ئاسان نییە”.
وتیش: "ئاڵشتکاریەیل سیستەم دارایی جەهانی لەدوبای جەنگ جەهانی دویەمەو مەرجەیلیگ چەسپان کە لەناوی فرەی وڵاتەیل پشت وە دۆلار ئەمریکی بەسان جویر یەدەگیگ سەرەکی، وە لەوەرچەوگردن ئەوە کە فرەترین دراو جەهانی پەسەنکریای و وەکارهاتگە لە مامەڵە ناودەوڵەتییەیل کە هیلێد دۆلار بوودە داهاتیگ ئارامتر."
عراق یەدەگ دراو گران نزیکەی 100 ملیار دۆلار دیرێد، و 152 تۆن تەڵا لە پشتدەسە دیرێد، کە یەکسانە وە نزیکەی 12 ملیار دۆلار.
