حەداد: شاند هەرێم رازی وە پێشنیار فراکسیۆنە پەرلەمانیەکان لە بەش هەرێم لە بوودجەگە بوی
شەفەق نیوز/ بەشیر حەداد جیگر سەرۆک پەرلەمان عراق، ئمڕوو شەممە، راگەیان شاند هەرێم کوردستان رازی لە پێشنیار فراکسیۆنە پەرلەمانیەکان بوی ک لەلایەن دەسەی دارایی لەباوەت بەش هەرێم لە بوودجەی ٢٠٢١ واژوو کریاگە.
حەداد لە کۆنگرەیگ رۆژنامەوانی لە پشت کۆبونەوەی دەسەی دارایی وەگەرد تیمیگ حکومەتی لە وەزیرەیل وت: باس دەربارەی نرخ خەرجکردن کریا و دووپات لە گرنگی ئەوە کریا ک بوودجەی ئمساڵ قەرزار نەوود، وتیش: حکومەت و فرەی ئەندامەیل دەسەی دارایی هانە گەرد مەنین نرخ خەرجەگە وەی شیوەی ئیسە، و ئەوەسا وەگەرد پارێزگار بانگ ناوەندی کۆبونەوە کریەێد، ودەسەیگ هاوبەش لە حکومەت و پەرلەمان ئەرا باسکردن لە مقەیەتیکردن نرخەگە دروس کریەێد ک کاریگەری لەبان رەوشەیل بازاڕ نەکەێد و خەرجەگە لەناو بوودجەگە نەوود.
حەداد ئاماژە کرد ک سەرۆکایەتی ئەنجومەن نۆێنەران ئەوەسا کۆبونەوەیگ وەگەرد فراکسیۆنە پەرلەمانیەکان وەرجە دانیشتنەگە کەن تا بڕەسنە رێککەفتنیگ ئەرا رەدکردن بوودجەگە، و باس لە ئومید خوەی کرد لە دانیشتن سوو یەکشەممە دەنگ لەبان بڕۆژەی یاساگە بیریەێد.
لە باوەت بەش هەرێم کوردستان لە بوودجەگە، حەداد ک خوەی ئەندامە لە فراکسیۆن پارت دیموکرات کوردستان لە پەرلەمان عراق وت: ئەو مادە ک پەیوەندی وە بەش هەرێم کوردستان لە پڕۆژەی یاساگە دیرێد، هووکار و گرفت لە دەنگنەیان لەبان بوودجەگە نەوی.
هەمیش وت: شاند حکومەت هەرێم کوردستان رازی لەو دەقە بوی ک وەگەرد فراکسیۆنە سیاسیەکان لەباوەت بەش هەرێم لەبانی رێککەفتن.
حەداد دووپات کرد ک دەسەی دارایی لە پەرلەمان واژوو لەبان ئی رێککەفتنە کرد، و بویە مادەیگ چەسپیاگ لە بوودجەگە، و توانای دەستکاریکردنی یا هەڵوەشانەوەی وەهەر شیوەیگ لە شیوەیل نییە، چوونکە بویە مادەیگ لە یاساگە، و جەخت کرد ک شاند هەرێم و نۆێنەرە کوردەکان لە پەرلەمان وەگەرد ئی دەق واژووکریاگە رەفتار کەن و رازی لە هەڵوەشانەوەی نێەوون.
هەمیش وت: لایەنەیلیگ هەس تەقەلای ریگری لە بڕیاردان پڕۆژەکە دەن، تا عراق ئمساڵ وەبی بوودجە بمینێد.
