تۆڵەی هووزەیل و تیرۆر نوا لە هاتنەوەی هەزاران ئاوارە گرێد
شەفەق نیوز/ بەرپرسەیل حکومەت خۆجێی و هووزەیل پارێزگای سەلاحەدین، هوڵدەن کەیس ئاواره‌یل یەکلاوەبکن، وبارنەیانەو ئەرا ناوچەیل خوەیان ک لەلیان کۆچ کردنە لە مەوقەی کۆنتڕۆڵ داعش لەبان پارێزگاگە له ساڵەیل ١٠١٤ و ٢٠١٥ ، ولەناو نزیکەوبوین هاتنەوەی زیاتر لە ٤٠٠ خیزان ئاوارە، ناڕەزایەتیەیل و تۆڵەیل هووزەیل نواگیریان کەێد، وەل مەترسییگ ک شایەت کوڕەیل بڕیگ لە ئاوایەیل وەگەرد تیرۆرستەو کارکەن.
دیاریترین ئەو ناوچەیلە ک مرافەو ململانە دەربارەی هاتنەوەی ئاوارەیل لەتیان بوی، ناحیەی یەسربه له باشوور سەلاحەدین، ک هیمان کێشەی تۆڵەی هووزەیل وریگرە ئەمنیەگان ها لەناوی، ک دانریەێد وە دیارترین هۆکارەیل لە دیرکەفتن هاتنەوەی ئاوارەیلەگە وەرەو ئاوایە کشتوکاڵیه‌گانیان.
حاریس عەبدولنەبی ئەرا ئاژانس شەفەق نیوز ئویشێد؛ زیاتر لە ٥٠٠٠ خیزان ئاوارە هەرچەن موڵەت وەرگردنە، وبونەی کارەیل هووزەیی ولیست ئەمنی.، نەهاتنەسەو ئەرا ناوچەیل ناحیەگە،
عەبدولنەبی دیاریش کرد؛ ک هاتنەوەی خیزانەگان گریەبەساس وە یەکلاکردنەوەی تۆڵەو گرفتەیل هووزەیل، ووەخشین خیزانە پەیوەندیدارەیل وپشتگیرەیل داعش، ئەراوە ک کەسەیل تیرۆرست نانەو وەناوبەین خیزانە ئاوارەگان. وتیش؛ کۆمیتەیگ تایبەت لە ساڵەیل وەرین دروس بوی، لە لاین دەزگا ئەمنیەگان و وەرەیوبەرایەتی پارێزگاگە و وەڕیەوبەرایەتی خۆجێی ناحیەگە، ئەرا سەرپەرشتی کەیس هاوردنەوەی خیزانە ئاوارەگان، وەرەو ناوچەیل خوه‌یان، وهاوکاریکردنیان تا دەسبکەنە چالاکیەیل کشتوکاڵ و ژیان سروشتی ئه‌را نه‌هیشتن داعشه‌یل تیرۆرست.
عەبدلنەبی دەسخوەشی لە هه‌وڵه‌یل هووزی وحکومەتی کرد وەبونه‌ی رەسینیان ئەرا چارەسەرەیلیگ له‌باوه‌ت هاوردنەوەی ئاوارەیل، و نه‌هیشتن ناکۆکی، ورێککەفتن لەبان وه‌خت هاتنەوەی ئاوارەیل. وەریەوبەر ناحیەگە راگەیان وەنزیکەو بوین هاتنەوەی زیاتر لە ٤٠٠ خیزان ئاوارە ئەرا ناوچەیل رفێعات وەهەماهەنگی وەل دەزگا ئەمنیەگان و حەشد شەعبی، ئەرا چوڵکردن ئاوایەیل کۆچبەرەیل وئاسانکردن هاتنەوەیان ئەرا ناوچەیلیان، ودووارە دووپات کرد لە قەیەغەی هاتنەوەی هەر خیزانیگ داواکریاگ یا هاوکار وەگەرد ریخریاگ داعش ئەرا ناوچەیل ناحیەگە.
ناحیەی یەسرب ناوچەیگ دەوڵەمەنە وپڕە لە بوسانەیل بەردار لە دارەخورما و تورشیاتی ، ک دیمەن سەوزیگ و سروشت رەنگینیگ دیرێد، ودانیشتوانی دەور ٧٢٠٠٠ کەسە.
