تۆمارکردن تووشهاتنه‌یل نوو وە کۆڕۆنا لە زیندانیگ لە عراق
شەفەق نیوز/ سەرچەوەیلیگ چەودیر، ئمڕوو جومعە، خەوەردان لە تۆمارکردن تووشهاتن نوو وە ڤایڕۆس کۆڕۆنا لەناو زیندانیگ لە لا چەپینەی مووسڵ، پایتەختە خۆجێیەگەی پارێزگای نەینەوا.
سەرچەوگان ئەرا ئاژانس شەفەق نیوز وتن: ٥ تووشهاتگ وە کۆرۆنا لە ناو زیندان فەیسەڵیە لە لا چەپینەی مووسڵ تۆمار کریا، دووان لە گریاگەیل و سێیان لە ئەندامەیل وەڕیەوبرایەتی زیندانەگە.
سەرچەوەگان هەمیش وتن: وەڕیەوبردن زیندانەگە داوا لە فەرمانگەی تەندروسی کرد تاقیکردنەوەی گشتگیر بکەێد ئەرا گریاگەیل و ئەو کەسەیلە هانە بان بەندیخانەگە، وریکارەیل راسی بوەن، بەڵکم کادرە تەندروسیه‌گان داوای لێبوردن کردن لەوەر دابیننەوین توانا.
سەرچەوەگان دووپاتکردن ک داواکاری هەس ئەرا ریکارەیل راسی ئەرا نواگردن کارەساتیگ، و زیایبوین هەژمار تووشهاتگەیل ئی ڤایڕۆسە لەناو هۆڵەیل بەندیخانەگە.
کۆمسیۆن باڵای ماف مرۆڤ عراقی، ئمڕوو، هووشداریدا لە بڵاوبوین پەتای کۆڕۆنا لەناو زیندانەگان و ناوەندە بەندییەگان، وداوای چارەسەرکردن رەوش قەرەباڵغ لەو شوونەیلە كرد.
جی باسە ک بانگەواز فرەیگ دەرچگ لە پەرلەمانتارەیل و رێکخراو کۆمەڵگا مەدەنیەگان، تەنانەت لە وەرپرسەیلیش وە گرنگی دەرکردن وەخشین گشتگیریگ ئەرا ئەو زیندانیەیلە ک تاوان کوشتن و گەندەڵی نەکردنە، ئەرا سووکەوکردن ژمارەیان لەناو زیندانەگان، و کەمەوکردن هەسییان لەوەر بڵاوبوین ڤایڕۆس کۆڕۆنا، تایبەت وە هووکار گردەوبوینەگان.
