تورکیا پەیمان زیایکردن تەکان ئاو ئەرا عراق دەێد

شەفەق نیوز/ وەزارەت سامانەیل ئاوی، ئمڕوو شەممە، ئامادەیی تورکیا ئەرا زیایکردن تەکانەیل ئاو لەی رووژەیل بانانە راگەیان.  

وەزارەتەگە لە بەیاننامیگ رەسیە ئاژانس شەفەق نیوز وت: مەهدی رەشید حەمدانی وەزیر سامانەیل ئاوی، شەوەکی ئمڕوو گردەوبوینیگ لەبان ئەنتەرنێت وەگەرد نوینەر سەرۆک تورکیا ئەرا باوەت ئاو فیسیل ئوروغڵۆ ئەنجام دا، ئەرا باسکردن لە رەوش داهاتەیل ئاو لە چەم دیجلە و فورات لەناو عراق،  و داوا لەلی کرد دووارە بنووڕێدە تەکانەیل ئاوەگە تا وەگورەی بەش عراق بوود، ولەی رەوش کەمئاویە دەری بکەێد.  

وەگورەی بەیاننامەگە، شاند تایبەت سەرۆک تورکیا ئەرا باوەتەیل ئاو، ئامادەیی خوەی نشان دا، تا فەرمان بەێدە دامەزراو ئاو وبەنداوەیل تورکیا تا تەکان ئاوەگە لە چەن رووژەیل بانان مەرەقەز بکەێد.