ته‌ندروسى نوێنه‌رايه‌تى داواى لاوردن وه‌زير كاره‌با ئه‌كا
شه‌فه‌ق نيوز/ قوته‌يبه ئبراهيم جبورى سه‌رۆك ليژنه‌ى ته‌ندروسى و ژينگه‌ى نوێنه‌رايه‌تى داوا له سه‌رۆك وه‌زيره‌يل كرد هه‌مواركردنه‌وه‌ى وه‌زارى ئه‌نجام بيه‌ێد و لاوردن وه‌زير كاره‌با له‌تى بگرێده خوه‌ى له‌وه‌ر سه‌رنه‌كه‌فتنى له ئداره‌ى دوسيه‌ى كاره‌با.
جبورى له به‌ياننامه‌يگ ئه‌را شه‌فه‌ق نيوز وت: ئه‌را ماوه‌ى سێ رووژه پاريزگايه‌يل خوه‌رئاواو پاريزگايه‌يل ناوڕاس و له‌وانه‌يش پاريزگاى سه‌ڵاحه‌دين بى كاره‌بان و پله‌ى گه‌رمايش ره‌سيه‌سه زياتر له په‌نجا پله‌ى سه‌دى، ك ئايا وه‌زير و خيزانه‌گه‌ى وه‌رگه‌ى مه‌ندنه‌وه‌ى وه حاڵه‌ته‌و ئه‌گرن له كه‌شيگ گه‌رماوى وه‌بى كاره‌با؟ ئه‌ى كووا لێدوان و كۆنگره‌يل رووژنامه‌گه‌رى و قه‌وڵه‌يلى ك داره‌ى وه‌رجه هاتن وه‌رز تاوسان؟
جبورى هه‌ميش وت: مه‌ندنه‌وه‌ى پاريزگايه‌يل ناوڕاس و خوه‌رئاوا وه‌بى كاره‌با ئه‌را ماوه‌ى سێ رووژ، ماناى ئه‌وه‌سه ك لوئه‌ى خه‌تيب وه‌زير شكه‌ست هاوردگه له ئداره‌ى گرنگترين دوسيه‌ى خزمه‌تگوزارى ك ئه‌ويش دوسيه‌ى كاره‌باس و پابه‌ند نادێ وه جيوه‌جيكردن قه‌وڵه‌يلى ئه‌را زيايكردن وه‌پيداين سه‌عاته‌يل كاره‌با، به‌ڵكوو وه‌چه‌واشه‌وه كاره‌با وه ته‌مامى له چه‌ن پاريزگايگ بڕيا.
