تەواوبوین کارەیل مینەکردن بیسەروشوینەیل لە ئاگرەگەی وەزیریە ودی تەرم نوویگ نییە
شەفەق نیوز/ تیمەیل وەرگری شارستانی، ئمڕوو سێشەممە، کارەیل مینەکردن بیسەروشوینەیل لە بینای وەزیریە تەواو کردن، دویای نۆ رووژ لە کار وەردەوام لە شەو و رووژ.
وەڕێەوبەرایەتی وەرگری شارستانی لە بەیاننامەیگ رەسیە ئاژانس شەفەق نیوز وت: تیمەیل پسپۆڕ دویای کپەوکردن ئاگر ناو بیناگە، دەسکردنە مینەکردن بیسەروشوینەیل لەژیر رمیاگ بیناگە، ک یە درویژترین مار مینەکردن قوربانیە لە میژوو وەرگری شارستانی.
دیاری کرد ک ئاگرەگە لە ساعەت یەک و ١٠ خولەک نیمەڕو لە رووژ شەش تەشرین دویەم هیز گرد، و یەکەم جار لە بینایگ سێ قاتی وە رووبەر ٢١٠٠ مەتر چوارسویکە دەسوەپی کرد، وەگەرد قات چوارەم ک وە سەندویچ پەنەڵ دروس کریاگە ک وەزوی ئاگر سینێد، وەگەرد ژیرمەنیگ ئەرا ئەمارکردن بوون لەلایەن کۆمپانیایگ تایبەت.
وتیش: وەگورەی راپۆرتەیل سەرەتاهه دەرکەفتیە ک هوکار ئاگرە دویای کەفتن پاچینەیگ (وینج) بویە لەوەر بار زیای، ک بەڵاچەیگ لەلی دروس بوی، و بڵویزە لە شویشەیل بوونەگە کرد، و ئاگرەگە وەزوی هیز گرد.
