تەندروسی عراق راگەینێد رەسین وە لووتکەی شەپۆل سێیەم
شەفەق نیوز/ وەزارت تەندروسی وژینگەی عراق، ئمڕوو دووشەممە، بانگواز هاووڵاتییەیل کرد، و باس رەوش تەندروسی لە وڵاتەگە وە «فرە رخبەر» کرد، و نشان دا ک بیماری سێیەم شەپۆلەگە سەختە و مردنەیل لە بەرزەوبوینن.
وەزارەتەگە لەبەیانامەیگ رەسیە ئاژانس شەفەق نیوز وت: هانی عقالی جینشین و ئەرکدار وەزارت تەندروسی پەیامیگ ئەرا خەڵکەگە لە خەسەخانەی زاری فەیاز لەناوڕاس بەغداد پایتەخت ئاڕاستە کرد، ک وت: رەوش پەتاگەی عراق فرە رخبەرە، و دیاری کرد ک شمارەی فرەیگ لە خەسەخانەیل خەفتنە و بیمارییان سەختە.
عقالی دیاری کرد ک وەزارت تەندروسی وژینگە بەیاننامەیلیگ ئامادە کرد ئەرا رەفتارکردن وەرد پەتاگە لەوەخت هاتنی، و تکا لە گشتی کەیمن پابەند وە رینمایل مقەیەتی بوون وەتایبەت زیاترکەرەیل عەرەفات، وتیش؛ شمارەی یاوەرەیل وەگەرد بیمارەگە فرە گەورەس و پابەندی وە ریکارە مقەیەتیەکان نەیرن و دەمامەک نێوەسن.
ودیاری کرد ک شمارەی کادرەیل پزشکی ناو خەسەخانەیل بەش ئەو شمارەیل گەورەی تووشهاتگەیلە نێکەێد، و جەخت کرد ک مەگەر وە وەرگردن واکسینەگە توێنیمن قەیران پەتاگە بنەیمنە پشت سەر و شمارەی خفتگەیل ناو خەسەخانەیلە کەمەو بکەیمن.
و دیاری کرد ک بیماری ڤایرۆسەگە فرە رخبەرە و وەسەختی گوزەران کریەێد، و دووپات کرد قورتاربوین بەی مەترسیە خوەی واکسینە.
عقابی داوا لە بیمار و یاوەرەیل کرد پابەند وە رینمایل تەندروسی بوون و هیتەر وەناو نارن و جگارە لەناو هۆڵەیلە نەکیشن.
هەمیش وت: ئیسە ئیمە هایمنە لووتکەی شەپۆل سێیەم و دیرێد شمارەی تووشهاتنەیل و مردنەیلە زیایەو بوون، و داوا لە هێزە ئەمنیەیلە کرد هەسییان لەناو گشت خەسەخانەیلە خەسەو بکەن، تا پاڵ هەر کەسیگ بنەن ک نوای پێشکەشکردن خزمەتی ئەرا بیمارەیل گرێد، ونوای هاتن یاوەرەیل بگرن.
و دووپات کرد ک ئیمە وەپیمان نێکریەێد ئی بیماریە لەناو بەیمن، مەگەر وە واکسین، ک بایەتە هاووڵاتییەیلە واکسینەگە وەربگرن وەخاتر مقەیەتیکردن و سەڵامتییان لە بیماریەگە، وتیش؛ لە هویرمان نێچوودە دەسخوەشی لە گشت کادرەیل پزشکی و تەندروسی و پاڵپشتی و ئیداری و راگەیانن و ئەمنی بکەیمن ئەرا رەنجەیلیان تا ئی رووژە لە نواگردن پەتاگە.
عقابی داوا لە گشتی کرد هاوکاری بکەن لە بڵاوکردن هووشیاری لە میدیایل راگەیانن و پلاتفۆڕمەیل پەیوەندی کۆمەڵایەتی یا لە ری پەیوەندی راستەخۆ و نا راستەخۆ و لە گشت ناوچەیلە ک داتیشتوەیلیان فرەی ئەرا مقەیەتیکردن ئاسایش تەندروسی وڵاتەگە.
