تەندروسی عراق بەرزەوبوین زوینەیگ لە تووشهاتنەیل کۆڕۆنا نشانە کەێد و تەمەیل نوویگ دەرکەێد
![تەندروسی عراق بەرزەوبوین زوینەیگ لە تووشهاتنەیل کۆڕۆنا نشانە کەێد و تەمەیل نوویگ دەرکەێد](https://media.shafaq.com/media/arcella/1613827948346.jpeg)
شەفەق نیوز/ وەزارت تەندروسی وژینگەی عراق، ئمڕوو شەممە، راگەیان بەرزەوبوین سەختیگ لە تووشهاتنەگان کۆڕۆنا لەناو دوو چین لە کۆمەڵگاگە ک خوەیان مناڵ و گەنجەیلن، لە نشانەیگ لەبان بڵاوبوین بنچینە نووەگەی پەتاگە لە وڵاتەگە.
وەزارەتەگە لەبەیانامەیگ رەسیە ئاژانس شەفەق نیوز وت: تووشهاتنەگان لە رووژەیل دویایین وەشیوەی بەرزیگ وەردەوام بوین، وەگەرد تۆمارکردن تووشهاتتەیل سەختیگ لەلای مناڵەگان و تەمەنە کەنجەگان، و ئەیە یەکەم جارە بووک، ک خوەی نشانەیگە لە بڵاوبوین بنچینە نووەگە ک جیوازە وە زوی بڵاوبوینی و سەختی بیماریەگەی لە خود وەختەگە.
بەیاننامەگە دووپات کرد ک ئیسە ئەو وەختەسە ک کۆمەڵگاگە وەگشت چینەگانی ئەو ریکارەیلە بوەێد ک بیلن گواستنەوەی پەتاگە لەناونی هاووڵاتییەگان کەمەو بکەن، و بایەتە ئیسە بڕیارەیل دەسەی باڵای تەندروسی و سەڵامەتی نیشتمانی وەشیوەی سەختیگ لە گشت ناوچەیل عراق جیوەجی بکەن.
بەیاننامەگە جەخت کرد ک خەمسەردی لە جیوەجیکردن ریکارە مقەیەتیەگان و جیوەجینەکردن بڕیارەیل دەسەی باڵای تەندروسی و سەڵامەتی نیشتمانی وەگەرد بڵاوبوین بنچینە نووەگە هەڕەشەی زوی بەرزەوبوین تووشهاتنەگان لەماوەی رووژەیل ئایندە دەێد، ک دامەزراوە تەندروسیەگان خەێدە وەر مەترسی گوماکردن کۆنتڕۆڵەگە لەبان ژمارەی زیایبوی تووشهاتنەگان، ک بوودە هووکار لە زیایبوین مردنەگان.
وتیش؛ تەنیا رییگ ئەرا نواگردن ئی مەترسیە ئیسە خوەی پابەندبوینە وەگشت بڕیارەیل دەسەی باڵای تەندروسی و سەڵامەتی نیشتمانی، وەتایبەت لە وەکارهاوردن دەمامەک و دویرەوکەفتن کۆمەڵایەتی و تەمیسکردن دەسەیل وەشیوەیگ وەردەوام، و دویرەوکەفتن لە گشت قەرەباڵغەگان و شوینە تەسکەگان، و هاوکاری وەگەرد تیمە تەندروسیە چەودیریەگان لە جیوەجیکردن ریکارە مقەیەتیەگان.
هەمیش وت؛ لە بنەمای وەرپرسایەتی مێژوویمان لە نوای پیشەگەمان، داوا لە گشت وەزارەتەگان و دامەزراوە حکومەتیەگان و تایبەتەگان کەیمن گشت چالاکیە بخەنە دویا، و داوا لە وەقف شیعی و سونی و سەرپەرشتیارەیل گشت مەزارە پیرۆزەگان کەیمن، و پارێزگارەیل پارێزگا عراقیەگان ک مەزارە پیرۆزەگان هاناویان، تەقەلایل فرەیگ بیەن ئەرا وسانن گشت رسوومە ئاینیەگان لەماوەی رووژەیل ئایندە، و پابەندی وە ریکارە مقەیەتیەگان وەشیوەیگ تەواوەتی لەناو مەزارەگان.
بەیاننامەگە هەمیش وت: دویای ئەوە ک بڕیارەیل دەسەی باڵای تەندروسی و سەڵامەتی نیشتمانی کەفتە ئاست جیوەجیکردن، داوا لە گشت هاووڵاتییەگان کەیمن وەگورەی وەرپرسایەتیەگە بوون، و ئەو مەترسی گەورا بفامن، و پابەند وە ریکارە مقەیەتیەگان بوون، و لە خود وەختەگە ئەرزشدار پابەندبویەگان وە دەمامەک و دویرەوکەفتن لە گردەوبوینەگان و تەمیسکردن دەسەیل کەیمن.