تەقینەوەیگ لە مەکتەویگ سەربازی لە ناو فڕۆکەخانەی ناودەوڵەتی بەغداد

شەفەق نیوز/ سەرچەوەیگ ئەمنی وەرپرس، ئمڕوو شەممە، خەوەردا لە تەقینەوەیگ لەناو مەکتەویگ سەربازی لە فڕۆکەخانەی ناودەوڵەتی بەغداد.

سەرچەوەگە خەوەردا ئاژانس شەفەق نیوز ک شەوەکی ئمڕوو چشتیگ لەناوبەین کامپیگ ئاسمانی «عەلا» و تەیمانەی مەکتەو بەرسڤ خێرای سەربازی لەناو فڕۆکەخانەی بەغداد تەقیەو.

سەرچەوەگە وتیش؛ هیچ زەخمداربوینیگ لە رووداوەگە نەویەو، و هێزەیل دژە تەقەمەنیەگان دەسکردنە لێکۆڵینەوە ئەرا ئاشکراکردن هووکارەیل تەقینەوەگە.

دویای ئەوە، سەرچەوەیگ تر وت: تەقینەوەگە لە تەقەمەنییگ بویە و دڵرکەفتگە ئەگەر دەنگی بویە یا تەقەمەنی، و زەرەدەیلیگ لە تەیمانەی مەکتەوەگە داگە.

ودیاریکرد ک هیچ فڕۆکەیگ ئەمریکی باڵ نەکردگە و هیچ دویکەڵیگ بەرزەو نەویە جوور ئەوەگ لە بەشیگ لە ماڵپەڕەیل پەیوەندیە کۆمەڵایەتیەگان باسی کریا.