بەغداد...دەسگیرکردن ژنیگ پارێزەر چز کابرایگ دایە لە وەرانوەر بڵاونەکردن ڤیدیۆی وە رویتی
2023-10-22T09:37:18+00:00
شەفەق نیوز/ سەرچەوەیگ لە پولیس عراق، ئمڕوو یەکشەممە، خەوەردا لە دەسگیرکردن ژنیگ پارێزەر کە چز کابرایگ دایە و هەڕەشەی بڵاوکردن ڤیدیۆی رویتی کردیە، لە ناوچەی مەنسووڕ لە بەغداد.
سەرچەوەگە وە ئاژانس شەفەق نیوز وت، هیزەیل ئەمنی ئەرکیگ ئەنجامدانە لە ناوچەی رواد کە ژنیگ پیشەی پارێزەرە وە توومەت ئەوەگ دەسگیرکریاگە بڕ سێ ملیۆن دینار عراقی لە کابرایگ وەرگردیە لەڕی چزدانی و هەڕەشەی بڵاوکردن ڤیدیۆی بەدرەوشتی ئەو کەسە.
وتیش، ئەو کەسە هێزەیل ئاگادارکردیە کە بویەسە قوربانی و ژنە توومەتبارەگە داوای 20 هەزار دۆلار لەلی کردیە لەوەرانوەر بڵاونەکردن ڤیدیۆگەی لەبان تووڕەیل کۆمەڵایەتی.
سەرچەوەگە وتیش، توومەتبارەگە و وەگەرد ئەو کەلوپەلەیلە دەسوەبانیان نریاگە ئەرا بنکەی پۆلیس مەنسووڕ کلکریایە و لێکۆڵینەوە وەگەردی وەردەوامە.
