بەرزەوبوین پلەی گەرمی و دەرفەت واران.. کەشوهەوای عراق لەی رووژەیل بانانە

دەسەگە لە بەیاننامەیگ رەسیە ئاژانس شەفەق نیوز وت:  کەشوهەوای وڵاتەگە ئەرا سوو دووشەممە، لە گشت ناوچەیل وڵاتەگە نیمچە ئەورە، و جاروباریش لە ناوچەی باکوور ئەور تەواوە، و پلەی گەرمی کەمیگ بەرزەو بوود.

وتیش: رووژ سێشەممە، لە ناوچەی ناوڕاس و باکوور نیمچە ئەورە تا ئەور تەواوە، وەگەرد دەرفەت نمە وارانیگ، و لە ناوچەی باشوور رووشنە، و پلەی گەرمی لە ناوچەی ناوڕاس و باکوور جویر خوەی مینێد، و لە ناوچەی باشوور کەمیگ بەرزەو بوود.

دیاری کرد کە رووژ چوارشەممە لە ناوچەی باکوور رووشنە تا نیمچە ئەورە و جاروباریش ئەور تەواوە وەگەرد دەرفەت نمە وارانیگ، و پلەی گەرمی لە باکوور و ناوڕاس کەمیگ بەرزەو بوود، و لە ناوچەی باشوور جویر خوەی مینێد.

دەسەگە وتیش: کەشوهەوای وڵاتەگە ئەرا رووژ پەنجشەممەی ئایندە، وەگشتی رووشنە تا نیمچە ئەورە، و پلەی گەرمی جویر خوەی مینێد.