ئاست بەشداریکردن کەمیگ لە دەنگدان هەڵوژاردن لە بەغداد و پارێزگایل عراق

پەیامنێر ئاژانس شەفەق نیوز وت: ریژەی بەشداریکردن لە دەنگدان گشتی بەغدا لە هەردوگ دیم کەرخ و رەسافە، ریژەی بەشداریکردن لە کەرخ  11% بویە، و رەسافە 9% بویە.

 کۆمسیۆن هەڵوژاردن لە پارێزگای زیقار ئەرا ئاژانس شەفەق نیوز وت: “ریژەی بەشداریکردن رەسیە 13%، یەیش نشانەس ئەرا ئەوە کە شمارەی دەنگدەرەیل رەسیە 124 هەزار دەنگدەر لە بڕ زیاتر لە 975 هەزار دەنگدەر کە ماف دەنگدان دیرن”.

 لەلای خوەییش نویسینگەی کۆمسیۆن پارێزگای دیوانیە ئەرا ئاژانس شەفەق نیوز دووپات کرد کە ریژەی بەشداریکردن تا نیمەڕوو 17.3% بویە، یەیش نشانەس ئەرا ئەوە کە شمارەی دەنگدەرەیل رەسیەسە 104 هەزار دەنگدەر لە بڕ 600 هەزار دەنگدەر کە ماف دەنگدان دیرن لە دەنگدان گشتی.

لە پارێزگای موسەنا، کۆمسیۆنەگەی ئەرا ئاژانس شەفەق نیوز دووپات کرد، “ریژەی بەشداریکردن رەسیە 20%، کە تا نیمەڕوو شمارەی دەنگدەرەیل رەسیە 86 هەزار دەنگدەر، لە بڕ 431 هەزار دەنگدەر”.

کۆمسیۆن هەڵوژاردن لە بابل، دووپات کرد کە ریژەی بەشداریکردن لە دەنگە گشتییەیل تا ئیسە رەسیەسە 17.22%، هاووەخت ربژەی بەشداریکردن تا نیمەڕوو لە کەربەلا 14.7% تۆمارکریاش، و پارێزگار ئەنبار ریژەی بەشداریکردنی تۆمارکردیە کە رەسیەسە 27%.

پارێزگاری دیالە تا نیمەڕوو ریژەی بەشداریکردن لە هەڵوژاردن کەم تۆمار کردیە، هەرلیوا ریژەی بەشداریکردن لە 12% رەد کردیە، وەگورەی کۆمسیۆن هەڵوژاردن، و پسپۆڕەیلیش هووکار کەمی بەشداریکردنەگەیان ئەرا رەوش کەشوهەوا و لەدەسدان متمانەیان وە سەرکردە سیاسییەیل گلەو دان.

سەرۆک دەسەی هەڵوژاردن پارت دیموکرات کوردستان لە دیالە، ئیبراهیم عەزیز، ئەرا ئاژانس شەفەق نیوز وت: "تا نیمەڕوو ریژەی بەشداری هەڵەژاردن لە خانەقین تا ئیسە لاوازە، هاتێ لەوەر ێەوش کەشوهەوا، بیبەشبوسن، یل هووکار ترەک بوود".

عەزیز دووپات کرد کە هەڵوژاردن وە ئاسان وەڕیەو چوود و تا ئیسە هویچ ناڕێکی و گیچەڵیگ توومار نەکریاس، پیشبینی کەێد لە چەن ساعەت ئایندە ڕێژەی بەشداریکردن بەرزەو بوود.

 لە ڕاپۆرت نویسینگەیل کۆمسیۆن لە گشت عراق، وەخت نیمەڕوەو، ریژەی دەنگدان گشتی لە پارێزگای بەسرە رەسیەسە 19%، لە پارێزگای کەرکوک 32%، لە پارێزگای نەجەف 13%، و ریژەی بەشداریکردن لە پارێزگای سەڵاحەدین رەسیەسە 25% .