ئاسایش لەناو خانەقین کیشێدەو و وەرپرسەگەی ئاشکرای هووکارەیلی کەێد
شەفەق نیوز/ سەرچەوەیگ ئەمنی لە دیالە، ئمڕوو چوارشەممە، خەوەردا لە کیشانەوەی هیزەیل ئاسایش لەناو شار خانەقین وەرەو بارەگای سەرەکیی، وە فەرمان فەرماندەیی ئۆپراسیۆنەیل دیالە.
سەرچەوەگە ئەرا ئاژانس شەفەق نیوز وت: فەرماندەیی ئۆپراسیۆنەیل دیالە ئاگادار ئاسایش کرد لەناوەند قەزاگە بکیشێدەو و روی بکەێدە بارەگای تایبەت خوەی، ودیاری کرد ک ئاسایش بڕیارەگە جیوەجی کرد.
سەرچەوەگە دووپات کرد ک ئاسایش لە سێ ناوچە کیشاوە ک وەشیوەیگ هەمیشەیی لەناویان بوی، و دیاری کرد ک مەفرەزەیلی لە بازاڕەیل خانەقین کیشادەو، وە پابەندی وە فەرمان فەرماندەیی ئۆپراسیۆنەیل دیالە.
دیاری کرد ک هیزەیل ئاسایش وەردەوامە لە ئەرکەیلی لەبنەمای فەرمانەیل فەرماندەیی ئۆپراسیۆنەیل وگرنگی ئەمنی.
لەلای خوەییش، عەقید ئازاد فائق وەرپرس ئاسایش خانەقین وت: هیزەیلی وە پابەندی وە فەرمان فەرماندەیی ئۆپراسیۆنەیل دیالە کیشانەو، وتیش: گشت هیزەیل خانەقین هانە ژیر فەرمان ئۆپراسیۆنەیل دیالە وەهەماهەنگی و رێکەفتن چەسپیاییگ ئەرا مقەیەتیکردن ئاسایش و ئارامی لە خانەقین.
فائق لە قسەیلی ئەرا ئاژانس شەفەق هوشداری کرد لە "سایتەیل فیتنە" لەبان سۆشیال میدیا کرد ئەوانەگ خوازن فیتنەیگ نەتەوەیی و گرفتەیلیگ لەناو خانەقین دروس بکەن، و بڵاوکردن خەوەرەیلیگ درووکانی.
وتیش: ئیمە لە خانەقین هایمنە ژیر فەرمان ئۆپراسیۆنەیل دیالە، و من خوەم وە ئەفسەریگ لە سوپای عراق دانەم، و هەرچەگ وە پیچوانەی ئەوە باش کریەێد ئامانجکردن ئاسایش و ئاشتەوایی کۆمەڵایەتیە لە خانەقین، ودووپات کرد ک ئیمە وە پلان و هەماهەنگی ئەمنی توکمەیگ هایمنە خانەقین، ونیەکەفیمنە ژیر چاو و قسەیل نادروس، و ئامانجمان یەکیگە ک خوەی ئاسایش خانەقینە.
لە سنوور قەزای خانەقین، زیاتر لە شەش هیز بڵاو بوینە، لەلیان؛ سوپای عراق، پێشمەرگە، پۆلیس فیدراڵی، حەشد شەعبی، ئاسایش، پۆلیس.
