کازمی لەساڵیاد هەڵەبجە: گفتوگۆی نیشتمانی تەنیا رییگە ئەرا بیناکردن دەوڵەت
شەفەق نیوز/ موستەفا کازمی سەرۆک وەزیران، ئمڕوو سێشەممە، پێشوازی لە ژمارەیگ لە پەرلەمانتارەیل هەڵەبجە کرد، وەیادکردن سیی و سێ ساڵیاد کوشتار بمبارانکردن هەڵەبجە وە چەک کیمیایی، لە سەردەم رژیم سەدام حسێن.
کازمی لە سەرەتای چەوپیکەفتنەگە وت: گەلەکەمان لە رووژە سەخت و دڵتەنگەکان هاوبەش بوی، نەگ تەنیا لە قۆناغ رژیم دیکتاتۆری، بەڵکم لە پشت ئەوەیش، بایەدە ئەو ژانە لە عراق بووسیەێدەو، و وەدەس خوەمان ئومید لەجیای دروس بکەیمن، بایەدە دویارووژ نەوەیل گەلەکەمان لە گوزەیشتەیان خاستر بوود، و دووپات کرد ک وەرپرسایەتی ئی ئاڵشتبوینە کەفێدە گەردن ئیمە و گشت وەرپرسیگ.
کازمی وەگورەی بەیاننامەی نووسینگەگەی دیاری کرد ک خستەڕوو هەڵمەت گفتوگۆی نیشتمانی خوەی گەوهەر ئی ئومیدەسە، و لە سەرتاسەر وڵاتەگەمان گفتوگۆی ئاشکرایگ و وەرپرسیگ خوازیمن ک کۆتایی وە ئەو گەردەلوولەی رووژەیل دڵتەنگە بارێد، و دووپات کرد ک گفتوگۆکردن بۆنیگ نێخوازێد، ک خوەی تەنیا رییگە ئەرا بیناکردن دەوڵەت و قویلەوکردن ئەرزشی و بتەوکردن رەسینەوەیلی، تا بویمنە خاوەن توانی سەرکەفتن.
کازمی وتیش؛ سەرچەوەی سەرەکی زیانەیل گەلەکان هەر گومابوین پەیمانەیل دەوڵەت بوبە، ک تاوان و تیرۆر و جینۆساید لەنوای گەلەگە واتەگەی ئەوەس ک پەیمانەیل وڵاتەگە گوما بوینە.
سەرۆک ئەنجومەن وەزیران دووپات کرد ک وەرجەیە سەردان هەڵەبجە کردگە، و جوور داڵگ پێشوازی لەلی کردگە، و رویخوەشی و دووسی لە چەوەیل خەڵکەگەی و پیرەیل و ژنەیل و مناڵەیلی نووڕستیە، وتیش؛ ئەگەر هەڵەبجە جوور زەخمیگ مێژووییە، خو خەڵکەگەی وە رویخوەشییان و دووسییان دەرس قویلیگن هووکارە لەلیان بویمن و هوکارەی نەوەیل هاتگمان کەیمن.
