کازمی لە جەژن پۆلیس: خوازیمن ناوخۆ ئەرک تەواو خوەی هەڵگرێد
شەفەق نیوز/ موستەفا کازمی سەرۆک وەزیران، ئمڕوو شەممە، دووپاتکرد ک ویستگەیل گەورایگ ئەرا وەزارەت ناوخۆ هەس، و دیاریکرد ک ئەرک حکومەت ئەوەسە ک وەزارەتەگە ئەرک خوەی لە چارەسەرکردن رەوشە جیوازەگان هەڵگرێد.
کازمی لە ئاهەنگ ٩٩ جەژن پۆلیس عراق و دەرچگن خول ئامادەکردن ٢٧ لە پەیمانگای باڵای گەشەپێدان ئەمنی و ئیدارەیی، و هەلکردن کەرتەیل وەزارت ناوخۆ لەی بۆنە، ک ئاژانس شەفەق نیوز چەودیریی کرد وت: ئمڕوو لە ساڵیاد دامەزرانن پۆلیس پاڵەوان عراق ئاهەنگ کەیمن، ٩٩ ساڵ لە کردوە و ئەنجامەگان و قوربانیەگان، سڵاو خوەم ئاڕاستەی ئیوەی پاڵەوان لە هێزە ئەمنیەگان کەم، و لە گشت چینەیل وەزارت ناوخۆ ک خوەی نۆێنەرایەتی ناونشان دەوڵەت و پڕۆژەی نیشتمانی کەێد.
وتیش؛ عراقیەگان وەرگرانی ئەرزشدار قوربانیە گەوراگان کەن ک دامەزراوەیل وەزارەت ناوخۆ پێشکەشیان کردنە، شەهیدەیل ناوخۆ خوەیان شەهیدەیل و سومبلەیل عراقن، و جوور عراقیەیلیگ هەر رووژیگ وسیەیمن وە رێزگردن لەو قوربانیەیلە ک هیشتن مقەیەتی عراق بکەن و خاکی لە چنگ چەتەیل داعش تیرۆرست رزگار بکەن.
و ئاماژە کرد ک ویستگەیل گەورایگ لە کار ناوخۆ هەس و قەوارەی راستەقینەی خوەی نەوریانە، ئەمن ناوخۆیی و وەشوونکەفتن چەتەیل تاوانکاری و ئەرامکردن ناوچەگان و ئاسانکردن موعامەلەیل کارت نیشتمانی و پاسپۆرت و هەمیش کارەیلیگ تر، گشتیان چالاکیەیل گەورا و رەنجەیل فرەیگن ک بەرەگانیان لەبان زەوی دەرچن.
هەمیش وت؛ دڵنیایمن لە گەنجەیل و کوڕەیل و برایەیلمان لە کەرتەیل وەزارت ناوخۆ وە جووراجور چینەیل و ئەرکەگانی، ودووپاتکرد ک ئەرک ئیمە ئەوەسە ک رەنجەگان گورجەو بکەیمن ئەرا هاوردنەوەی کارەگان لە عراق ئەرا شوونەیل خوەیان، و وەزارەت ناوخۆ ئەرک تەواوەتی خوەی هەڵگرێد ئەرا کۆتایی هاوردن وە ڕەوشە جیوازەگان ک جەنگ دژوە داعش تیرۆرست چەسپانەیان.
