کازمی رینما دەێدە وەزارەتەیل و فەرمانگەیل دەوڵەت وە ئەنجامداین هەڵبژاردن زوینەگە لەمەوقەی خوەی
شەفەق نیوز/ موستەفا کازمی سەرۆک وەزیران، ئمڕوو پەنجشەممە، کۆبونەوەیگ کرد وەگەرد سەرۆک و ئەندامەیل کۆمسیۆن باڵای سەروەخوەی ئەرا هەڵبژاردن، وەئامەدەبوین ژمارەیگ لە وەزیرەیل و فەرماندە ئەمنیەگان، ئەرا باسکردن لە ئامادەکاریە هونەریەگان ئەرا ئەنجامداین هەڵبژاردنە زوینەگە لە مەوقەی خوەی، لە شەش حوزەیران ساڵ ئایندە.
کازمی لە کۆبونەوەگە وت: ئی حکومەتە رک بەساگە لەبان ئەنجامدان هەڵبژاردنەگە لە ئەو مەوقە ک بڕیاری دریاگە، چوونکە داواکاری جەماوەریە، و گونجیاگە وەگەرد رینمایل مەرجعیەت، و ئارازو هێزە سیاسیەگان، بیجە ئەوە ک خوەی لە بەڕنامە سەرەکیەگان حکومەتە، ک پابەندی بویە.
سەرۆک ئەنجومەن وەزیران هان کۆمسیۆنەگە دا لە خەسەوکردن تەقەلاگانی ئەرا تەواوکردن ئامادەکاریەگانی ئەرا هەڵبژاردنەگە، ودووپاتکرد ک حکومەتەگە وەگشت تواناگانی کارکەێد ئەرا ئەنجامدان هەڵبژاردنەگە لە مەوقەگەی خوەی.
کازمی رینما دا گشت وەزارەتەگان وە شکەستهاوردن لە ریگریەگان و ئاسانکردن ریکارەگان لەنووای کۆمسیۆنەگە، ئەرا کارکردن وەگشت تواناگانی لە ئەنجامداین هەڵبژاردنەگە لە وەخت خوەی.
