ڤایرۆسیگ نرخ ماسی لە عراق ئەرزان کەێد
شەفەق نیوز/ کۆمەڵەی بەرهەمکارەیل ماسی، ئمڕوو یەکشەممە، هوکارەیل داوەزین نرخ ماسی لەی دویاییە ئاشکرا کردن و لە خود وەختەگە دوا لە حکومەت کرد دەس بیەێدەوەر تا ئی بەرهەم ناوخوەییە لە ڤایرۆس (کوی هربس) قورتار بکەێد.
ئەیاد تاڵبی سەرۆک کۆمەڵەگە ئەرا ئاژانس شەفەق نیوز وت: داوەزین نرخ ماسی لەوەر هاتن ماسیەیل هاوردە لە دەوڵەتەیل هاوسا تایبەت ئیران تورکیا ئەرا ناو وڵاتەگە بوی، و ئی ماسیەیل هاوردە نرخیان ئەرزانە، ک نرخ یەک کێلو لەلیان رەسێدە لە ١٥٠٠ تا ٢٠٠٠ دینار، ک هیلێد ماسی عراقی کەڵەکە بوود، و هەمیش نرخ لەوەڕ گرانەو بوود، ئمجا نرخ ماسیەگە ئەرزانەو بوود.
تاڵبی دیاری کرد ک نرخ یەک تەن لەوەڕ رەسیە مەلیۆن ونیمیگ، ک ئەوسا وە ٦٠٠ هەزار دینار بوی، هەمیش نرخ کراکارەیل زیایەو بوی، ک ئیجا فرووشتن یەک کێلو ماسی عراقی وە ٥ هەزار دیناریش وە زەرەد خاوەنیە، وەلێ ناچارە وەی نرخە بفرووشێد لە رخ تویشهاتنی وە بیماری ڤایرۆس (کوی هربس)، ک مەزەنە کریەێد لە مانگ تەشرین دویەم ئایندە بڵاو بوود.
لە نواگردن ئی بیماریە، تاڵبی وت: دەسکریمنە کار وەرد وەزارەت کشتوکاڵی ئەرا پەیاکردن واکسین، و ئومید دیریمن لەی ساڵە هاوردەی بکریەێد، هەمیش ئومید دیریمن هاوردەی ئی واکسینە بوودە پڕۆژەیگ نیشتمانی ئەرا لەناوبردن ئی ڤایرۆسە، هەمیش داوا لە وەزارەت کشتوکاڵی و ئەمینداری گشتی ئەنجومەن وەزیرەیل کەیمن قەیەغەی هاتن ماسی هاوردە بکەن ئەگەر ئەرا ماوەی کەمیگیش بویە لە مانگ تەشرین یەکەم تو کانوون دویەم، تا خاوەن ماسیەیل بتوەنن ماسیەیلیان لە بازاڕەیل بفرووشن وەرجەیەگ ڤایرۆسەگە لەناویان بەێد.
وتیش: قیران کەمئاوی کاریگەری لەبان بەرهەم ناوخوەی داشت، باوجی عراق ئەمار گەورەیگ دیرێد، و گوڵەمەیل ودەرفەتەیل فرەیگ هەس، تا بەرهەمیگ هەکاتی دەوڵەتەیل هاوسا بکەێد.
