ئاگرە رخبەرەگەی وەزیریە.. کەفتنەسە مینەی ١١ کەس بیسەروشوین.. وینە
شەفەق نیوز/ تیمەیل رزگارکردن، ئمڕوو دووشەممە، لە مینەکردن کەسەیلیگ بیسەروشوین لەدویای ئەو ئاگر گەورە وەردەوامن، ک دویەکە لە ناوچەی وەزیریە لە بەغداد پایتەخت هیز گرد.
کامیرایل مۆبایل ڤیدیۆیل فرەیگ لەبان سۆشیال میدیا بڵاو کردن، ک نشان ئەو هەمکەی ویرانی و زیڕە دان لەو ئاگر گەپە ک لەناو ئەمار بوون بڵویزە کرد، و تا وەخت دیریگ لە دویەشەو، تیمەیل ئاگرکپەوکردن دەرقەتی نەهاتن.
دویەشەو وەڕیەوبەرایەتی وەرگری شارستانی ئەرا ئاژانس شەفەق نیوز وت: کۆتا ئامار رویداو ئاگرەگە رەسیە ٣٢ زەخمدار، ک لیوا کازم بۆهان وەڕیەوبەر گشتی وەرگری شارستانی و ئەفسەریگ وە پلەی لیوا، و بڕیگ لە ئەفسەر و ئەندامەیل لەناوی تویش چەوسیان و تاسیان هاتنە، وتیش: هیمان مینەکردن بیسەروشوینەیل وەردەوامە.
سەرچەوەیگ ئەمنی، شەوەکی ئمڕوو، ئەرا ئاژانس شەفەق نیوز وت: تیمەیل وەرگری شارستانی وەردەوامن لە مینەکردن بیسەروشوینەیل لەناو ژیرزەوی بینا رمیایەگەی وەزیریە، وەکارهاوردن ئامێرەیل هەسکردن و رزگارکردن سەنگین و سووک ئەرا لاوردن رمیاگ بینا سزیایەگە لەناوچەی وەزیریە.
دیاری کرد ک وەچەودیەیلیگ وتنە نزیکەی ١٠ تا ١١ کەس هانە ژیرزەمینەی ئەو بینا، و دووپات کرد ک مینەکردن ئەو کەسەیلە لەو شوینە وەردەوامە، باوجی تا مەوقەی نویسین ئی خەوەرە کەسیگیان پەیا نەویە.
