يە دوو ساڵە کارکەێ.. دەسگیرکردن تووڕێک سیخوڕی کە لەلایەن ئیرانەو دروس کریاس وینەی ئامانجە سەربازییەیل ئیسرائیل گردیە
شەفەق نیوز/ ئمڕوو دووشەممە، داواکار گشتی ئیسرائیل دەسگیرکردن تووڕیگ سیخوڕیی ئاشکرا کرد کە ئەرا ئیران کار کەێد، کە وینەی بنکە سەربازییەیل گردیە کە لە سەرەتای ئی مانگە پەلامارە مووشەکییەگەی ئیران کردیەسەی ئامانج.
داواکاری گشتی راگەیان کە تووڕەگە لە هەفت کووچبەر ئازەربایجانی دروس بویە کە لەلایەن ئیرانەو دامەزریاس، وەگورەی ماڵپەڕ عەرەبی رووسیا تودەی.
رووژ 1 تشرین یەکەم، ئیران پەلاماریگ گەورەی مووشەکی وەبان ئیسرائیل جیوەجی کرد، کە وە وتەی خوەی لە وەڵام کوشتن سەرۆک مەکتەب سیاسی حەماس، ئیسماعیل هەنیە، ئەمیندار گشتیی حزبوڵای لوبنان، حەسەن نەسروڵڵا، و جیگر فەرماندەیی لە سوپای پاسداران، عەمید عەباس نیلفۆرشان بویە.
لەلای خوەییش، رەوژنامەی "زە تایمز ئۆف ئیسرائیل" راگەیان "هەفت ئیسرائیلی وە توومەت سیخوڕیکردن ئەرا ئیران دەسگیرکریان، لە وەختیگ سەدان ئەرک ئەرا تەهران ئەنجامدانە"، وتیش؛ "گشت تۆمەتبارەیل یەهود خەڵک حەیفا و باکوور بوینە، لەناویان سەربازسگ هەڵهاتوی."
توومەتبارەیل وە وینەگردن و گردەوکردن زانیاری لەبان بنکە و دامەزراوەیل سوپای ئیسرائیل کار کردنە، لەوانە بارەگای وەرگری کیریا لە تەلئەبیب و بنکەی نفاتیم و رامەت داود، بیجگە لە شوینەیل سیستەم گومەزی ئاسنین.
بنکەی نەڤاتیم ئامانج هەردوگ پەلامار مووشەکی ئیران بوی، و بنکەی ڕامەت داڤید لەلایەن حزبوڵای لوبنان کریا ئامانج، وتنیش گوایە توومەتبارەیل نەخشەی شوینە ستراتیژییەیل لە پەلامارەیل گردنە، لەناویان بنکەی گۆلانی کە سەرەتای ئی مانگە وە فڕۆکەی بێفڕۆکەوان پەلاماریگ کوشندە کریا.
لێکۆڵینەوە دەرخست کە ئەو توومەتبارەیلە چەن ئەرکیگ جیاواز ئەرا دەزگا هەواڵگرییەیل ئیران ئەنجامدانە، وەگەرد بریکارەیل ئیران پەیوەندی داشتنە و سەدان هەزار دۆلار وەپییان دریاس
رووژنامەگە وتیش: بەشیگ لەو توومەتبارەیلە ماوەی دوو ساڵە سیخوڕی ئەرا ئیران کردگە و گشتیان لە سەرەتای جەنگەگەو بەشداری لە کارەیل سیخوڕی کردنە.
دووپات کرد کە داواکار گشتی نیاز دیرێد رووژ جمعە توومەتەیل وەبان توومەتبارەیل توومار بکەێد و داوای دەسوەسەرکردنیان بکەێد تا کۆتایی ریکارەیل یاسایی.
