وڵات چین.. لانەی نوو کۆڕۆنا لەناو مەترسی لە شەپۆڵ دوویەم
شەفەق نیوز/ راپۆرتەیلیگ رۆژنامەوانی باسکرد؛ ک بازاڕیگ خوارەدەمەنی لە پیکین پایتەخت چین، بویە لانەی تووشهاتن وە ڤایڕۆس کۆڕۆنا، لەناو مەترسییگ لە دوویەمین شەپۆڵ لە پەتاگە، ک وەشیوەیگ دیار لەوڵاتە ئاسیاییە کەمەو بوی.
ڤایڕۆس کۆڕۆنای نووەوبوی کۆڤید ١٩، لە دویادویای ساڵ وەرین لە شار ووهان دیاردا، ئیجا بویە پەتایگ جهانی تووش مەلیۆنا ئایەم هاورد.
وڵات چین لە کۆنتڕۆڵ بیماریەگە راگەیان، ودەسڵاتەیل ژیانەگە هاوردنەو ئاەر سروشتی خوەی، بەڵکم ئی وڵات ئاسیاویە هیمان پەتاگە لەناوی تۆمار کریەێد، هەرچەن ژمارەگەی کەمە.
ماڵپەڕ ستریت تایمز، نووساد ک دەسڵاتەیل پیکین پایتەخت، لەوەختیگ زوی لە شەوەکی شەممە، بازاڕ شینڤادی بەسان، ک خوەی گەورەترینە لە شارەگە.
وەرپرسەیل تەندروسی بڕیار رێکارەیل تاقیکردن سەخت دان، دویای دیارکردن تووشهاتن فرەیگ لەناو فروشەیل بازاڕەگە، وئەوانەگ ئەرا سەنین تیەن.
دەسڵاتەیل لە کۆنگرەی رۆژنامەوانییگ رون کردن، ک شەش حاڵەت روژ جومعە تۆمار کریاگە، وگشتی وەبازاڕەگە پەیوەندی دیرێد ک گوشت و ماسی وسەوزەمەنی ومیوە فروشێد.
بیجگە ئەوە، ٤٥ تووشهاتن وە ڤایڕۆس کۆڕۆنا دیاریکردن ئەرا کەسەیلیگ سەردان بازاڕەگە کردنە، لەناو ٥١٧ نموونە، بەڵکم گشت تووشهاتگەیل نیشانەیل بیماریەگە نەیرن.
وەگورەی بەیاننامەیل تەندروسی ک وەفەرمی لەچین راگەیاننە، تا ئیسە هویچ تووشهاتنیگ نیە ک نیشانەیل کۆڕۆنا وەپیەو بوود، لە گشت وڵاتەگە.
بانگ شینگۆ، جیگر وەڕیەوبەر ناوەند پیکین ئەرا رەوانگەی بیماریەگان و مقەیەتی، دووپاتکرد ک دوور نیە تووشهاتنەیل نوویگ تر وەکۆڕۆنا لە ئایندە بوود.
زاناگان ئووشن شایەت لەی وەختە ڤایڕۆسەگە یەکەمجا هات ئەرا ئایەم لە ری ئاژەڵەو لە بازاڕ ووهان، ناوڕاس وڵاتەگە.
دەسڵاتەیل داوا لە دانیشتوەیل ١١ کۆمەڵگە كردن ک پابەندبوون وە کەرەنتین ماڵی، و سێ مەکتەو و شەش ساوای مناڵ بەسان، لە چوارچیوەی رەنگەیل مقەیەتی لە کۆڕۆنا. دەسڵاتەیل لەی وەختە، تاقی دەور ١٠ هەزار کەس کەن ک لە بازاڕ شیڤاندی، ک ٩٠% لە سەوزەمەنی ومیوە رەوانە کەێدە پیکین پایتەخت.
