کوشتاریگ وە گەورەترین پەلامار رووسیا لەبان ناوچەیگ سنووری وەگەرد ناتۆ
میدیایل ئۆکرانیا ئی پەلامارە وە گەورەترین پەلامار ئاسمانی لەبان ناوچەی لڤیڤ باس کردن، لەو مەوقە کە لەشکرکیشی رووسیا لەبان ئۆکرانیا لە شوبات ٢٠٢٢ دەسوەپی کردیە.
وەرپرسەیل وتنیش: لە پەلامارەگە کە شەو گوزەشتە بویە، کۆمپانیایگ پیشەسازی لە شار لوتسک کە ناوەند ناوچەگەس، کەفتیەسە وەری.
یوری پۆهۆلیاکۆ، پارێزگار ناوچەی ڤۆلین راگەیان: چەن کەسیگ ئەرا خەسەخانە بریانە.
کۆمپانیای SKF ی سویدی بڵاو کرد کە کارگەگەی لە شار لوتسک وە شەو کەفتە وەر مووشەک و لە مدوو ئەوە سێ کارمەنی کوشیا.
ئەو گرتە ڤیدیۆیەیلە کە لەلایەن دەزگای فریاکەفتن دەوڵەت ئۆکرانیا بڵاو کریانە، نشان دن کە رزگارکەرەیل پیاییگ لە ژیر رمیاگەیل درارن.
ئاژانس ڕۆیتەرز دووپات کرد کە شوینەگە کارگەی SKF ە، و ناوچەیل ڤۆلین و لڤیڤ کەفنە بان سنوور پۆڵەندا، و سەدان کیلۆمەتر لە کڕ جەنگەگە دویرن.
لەلای خوەییش ئەو کۆمپانیا کە تووڕ کارەبای نیشتمانی وەڕیەو بەێد وتیە: کڕەیل کارەبای هەرێم لڤیڤیش زیان وەپییان رەسیە، بەڵام کارەیل گلەوداین کارەبا ئەرا ئەوانەگ زیان لەلیان کەفتیە وەردەوامە.
