کوشیان و زەخمداری ٧ کەس لە ئەنجام تەقەکردن لە ویلایەتیگ ئەمریکا
جێف مالێری، وەڕێوەبەر پولیس فلۆرانس لە کۆنگرەیگ رووژنامەوانی وت: "ئەفسەرەیل وەڵام پەیوەندییگ لە ماڵیگەو دانە لە ساعەت 2:51 شەفەق وە وەخت وڵاتەگە، و هەناێ لە شوینەگە نزیکەو بوینە، دەنگ تەقەی دەوانچە ژنەفتنە، و دوو قوربانی لە دەیشت پەیا کردن."
مالێری وتیش: ئەفسەرەیل چەن کەسیگ زەخمدار لەناو ماڵەگە پەیا کردنە، و فریاگوزاری سەرەتایی ئەرا فرەیان هاوردنە، و مەردم ناو ئاهەنگەگە شیوەی ماشینەگە ئەرا ئەفسەرەیل باس کردنە و ئەفسەرەیل چکنە ناو کەڕەکەگە و و ماشینەگە پەیا کردن وەلێ لەدەسیان دەرچگ.
پولیس وتیش؛ کەفتنەسە شوین ماشینەگە تا چگەسە ناو چاڵیگ لە شان ریەگە.
مالێری وتیش؛ مەزەنە کربەێد توومەتبارەگە مەوقەی رانین ماشینەگە تەقە لە خوەی کردگە، کە ماشینەگە لە دەسی دەرچگ و کەفتە ناو چاڵەگە، کە پولیس رەسانەی خەسەخانەی سانت ئەلیزابێس و لەورا گیانی لەدەسدا.
سێ لە قوربانییەیل ئەرا خەسەخانەی UCHealth بریان، و وەرپرسەیل وتن: تەندروسییان ناجیگیرە، وەلێ دیارە خاسەو بوون.
توومەتبارەگە لەلایەن بەشدارەیل ئاهەنگیگ جەژن لەداڵگبوین ناسیاس کە لە شان مەلوانگەیل ماڵەگە وەڕیەو چگ، ئەوانیش ناسنامەی ئەرا پولیس ناساننە، مالێری وتیش: وەرجەیە وە تاوانیگ سێکسی سزا دریاس، بەڵام دیار نییە پەیوەندی وە تەقەکردنەگەو بوود، وەگورەی خەوەر سی بی ئێس.
لە ناو کۆنگرە رووژنامەوانییەگە، سەرۆک پولیس ناسنامەی قوربانییەکیل وە ناوەیل شەین میلەر تەمەن ٢٠ ساڵ خەڵک فلۆرانس، هایدن ڕیبیکی تەمەن ٢٠ ساڵ لە شار ئێلسمێر، دیلانی ئایری تەمەن ١٩ ساڵ لە شار بێرلینگتۆن و مێلیسا بارێت تەمەن ٤٤ ساڵ لە شار فلۆرانس ڕاگەیان.
