کوشیان و زەخمداری 224 کەس لەلای کەمەو وە تەقیان غاز لە کینیا

ئیسحاق مایگا مواورا، قسەکەر حکومەت کینیا، لەبان پلاتفۆرم ئێکس وت: "بارهەڵگریگ کە پڕ بوی لە غاز تەقیەو، تووپیگ ئاگرینی گەورە لەلی کەفتەو کە وە تونی بڵاو بوی"، وتیش: ئاگرەگە "زیان وە شمارەیگ ماشین و شوین بازرگانی رەسان، لەناویان فرەیگ لە کۆمپانیا مامناوەند و بویچگەیل”.

وتیش؛ وەداخەو ماڵەیل گەڕەکەگەیش بڵویزە گردن و شمارەی فرەیگ لە دانیشتگەیل لەناو بوین چوینکە وەخت دیریگ لە شەو بویە.

 دیاری کرد کە دوو کەس "مەوقەی وەرگردن چارەسەر لە خەسەخانەی نایرۆبی گیانیان لەدەسدانە"، "222 کەس ترەک لەوەر ئاگرەگە زەخمدار بوین و زویوەزی ئەرا خەسەخانە بریان.

خاچ سوور کینیا وەرجەیە نزیکەی 300 زەخمدار راگەیان، وەبی  ئەوەگ دەسنشان هویچ مردنیگ  بکەێد.

جی باسە کە  فرە لە تیمەیل ئاگرکپەوکردن لە نزیک ساعەت 7:00 (4:00ی وەوەخت  جەهانی) وەردەوامن لە کارکردن و تەقەلای کۆنترۆڵکردنیئاگرەگە.  لە وەختیگ پەڵەی دویکەڵ سیا لە شوینەگەو بەرز بویاد.

 ئاگرەگە لە نزیک نیمەی شەو لە ناوچەی ئیمباکاسی هیز گرد و لە پەخشکردن ماڵپەڕ میدیایی سیتیزن دەرکەفت کە تووپیگ گەورەی ئاگر لە نزیک چەن شوینیگ نیشتەجیبوین دەرکەفت.

 جەیمس نگوگی وەرانوەر شوین ئاگرەگە نیشتیە، ئەرا ئاژانس فرانس پرێس وت: لە ماڵ بویمن و دەنگ رممەی تەقینەوەیگ گەورە وەکووشمان رەسی.