کوشیان 17 کەس وە تەقینەوەیگ لەناو ویستگەی قەتار لە پاکستان
شەفەق نیوز/ ١٧ کەس لەلای کەمەو گیانیان لەدەسدان، و نزیکەی ١٥ کەسیش زەخمدار بوین، لە ئەنجام تەقینەوەیگ لەناو ویستگەی کڕ ئاسنین باشوور خوەرئاوای پاکستان.
ئازانس فرانس پرێس لە زوان پولیس پاکستان، ئمڕوو شەممە، وت: ١٧ کەس لە ئەنجام تەقینەوەیگ لەناو ویستگەی قەتار سەرەکی لە پارێزگای بلوشستان لە پاکستان کوشیانە.
محمد بلوش، وەرپرس لە پولیس ناوخوەیی وت: تا ئیسە ١٧ کەس کوشیانەڕ و کار ئەرا دیاریکردن سروشت تەقینەوەگە کریەێد، لە وەختیگ موعەزەم جاه ئەنساری وەرپرس گشتی پولیس وت: هاتێ ئی ئامارە بەرزەو بوود.
وەسیم بیق قسەکەر خەسەخانەی ساندمان لە کویتا وت: ٤٦ کەس زەخمدار بوینە.
یەیش دویای راپۆرتەیل سەرەتایی تیەێد لە کوشیان ١٣ کەس لەلای کەمەو و زەخمداری ٢٥ کەس لە ئەنجام تەقینەوەیگ لەناو ویستگەی قەتار لە شار کویتا باشوور خوەرئاوای پاکستان.
وەرپرسیگ لە پولیس پاکستانی ئەرا ئاژانس رۆیتەرز وت: ١٣ کەس لەلای کەمەو گیانیان لەدەسدانە و ٢٥ کەسیش زەخمدار بوین لە تەقیان بومبیگ لەناو ویستگەی کڕ ئاسنین لە شار کویتا.
پاکستان کەفێدە روی زیایبوین پەلامارەیل چەکدار لە باکووری خوەرئاوای وڵاتەگە، و یاخیبوین جیاکەرەیل لە باشوور.
محمد بالوش فەرماندەی ئۆپراسیۆنەیل پولیس وت: تەقینەوەگە لەناو ویستگەی کڕ ئاسنین زویوەزوی بوی کە روی وەرەو پیشاوەر کەێد، کە نزیک بوی بکەفێدە ری، لە وەختیگ هویچ گرووپیگ وەرپرسایەتی خوەی لە پەلامارەگە ئاشکرا نەکرد.
