گورز ئیسرائیل وەبان گردەوبوین ئاست بەرزیگ لە تەهران.. وەرپرسیگ ئیرانی ئاشکرای رویداوەگە کەێد
شەفەق نيوز– تەهران
محمد جەعفەر قائمپەناه شاگرد سەرۆک ئیران ئەرا کاروبار جیوەجیکردن، ئمڕوو دووشەممە، هویردەکاریەیل نوویگ لەو گورز ئیسرائیلە ئاشکرا کرد کە گردەوبوینەگە ئەنجومەن باڵای ئاسایش نەتەوەیی ئیران کردە ئامانج، لەناو ئەو جەنگە کە تا 12 رووژ وەردەوام بوی.
قائمپەناه لە قسەیلی ئەرا میدیایەیل ئیرانی وت: تەقینەوەیل ئەو پەلامارە بڕەیل فرەیگ لە تەپوتووز و خوەڵ خستە ناو شوین گردەوبوینەگە، کارەبایش وەگەردیا بڕیا، کە بویە ژاوەژاویگ، و کەسەیل ئەو شوینە بەشبەشەو بوین وە مینەکردن رییگ ئەرا دەرچگن.
مەسعود پزیشکیان سەرۆک ئیران کە لەو گردەوبوینە ئامادە بویە، وت: رووشناییگ چەنە دەسیگ لەناوڕاس ئەو تەپوتووزە دیە، دویای ئەوە کە خوەڵەگە لاوردیە لەو شوین تەنگیگ لەو خاڵەو ئەرا دەرچگن پەیا بویە.
وتیش: کەسەیلیگ لەو شوینە دەسمیەتیی دانە تا لەو کەلەو رەد بوود، ئیجا خوەی دەسمیەتی ئەوەکان داگە تا یەک لەشوینیەک بچنە دەیشت.
وەقسەی قائمپەناه، وەرپرسەیل سوار ماشینیگ بوین کە لە گورزەگە زەرەد وەپی رەسیە، و دویای گڕیگ ئەو شوینە کەفتە وەر پەلاماریگ ترەک.
ئەنجومەن باڵای ئاسایش نەتەوەیی ئیران یەکیگە لە دیارترین دەزگایەیل سەروەرداری لە وڵاتەگە، و گەورە سەرکردەیل سیاسی و سەربازی گرێدەو، و سەرپەرشتی نەخشەکیشان سیاسەتەیل وەرگری و ئەمنی کۆمار ئیسلامی کەێد، وەتایبەت لە وەخت جەنگ.
وەرجەیە، پزیشکیان لە قسەیلی وەرد تووڕ تەلەڤزیۆن ئەمریکی چگە ژیر تەقەلای کوشتنی لەلایەن ئیسرائیل وە گورزیگ وەبان شوینیگ نهێنی ئەرا گردەوبوین، کە نووسەی جەنگ ئیسرائیل و ئیران لەورا بویە.
