واشنتۆن ئاماده‌ى داناين خه‌ت قرمز تازه‌يگه‌ ئه‌را ئه‌سه‌د

شه‌فه‌ق نيوز/ ماڵ چه‌رمگ ئاشكراى ئه‌وه‌ كرد ك دوناڵد ترامپ سه‌رۆك ئه‌مريكى ئاماده‌س ئه‌را داناين خه‌ت قرمز تازه‌يگ ئه‌را رژيم سوورى وه‌ جووريگ ك خوه‌ى له‌ به‌رمه‌يله‌ ته‌قينه‌وه‌يل بوينێده‌و، ئه‌ويش دوياى چه‌ن رووژيگ له‌ په‌لامار ئه‌مريكى ئه‌را بان بنگه‌يگ سه‌ربازى سوورى.

له‌ى باوه‌ته‌و، شون سبايسر قسه‌كه‌ر وه‌ناو ماڵ چه‌رمگ وت: ترامپ ئاماده‌س ئه‌را په‌لامارداين فيشتر بنگه‌يل سه‌ربازى سه‌ر وه‌ رژيم سوورى له‌ حاڵه‌تيگ ئه‌گه‌ر له‌نوو چه‌ك كيمياوى يا به‌رميله‌يل ته‌قينه‌وه‌ بارێده‌ كار.

سبايسر له‌ كۆنگره‌يگ رووژنامه‌نويسى وت: حاڵ ئه‌و مه‌ردمه‌ له‌وه‌ختيگ ك بوردمان ئه‌كريه‌ن وه‌ غاز و به‌رميله‌يل پڕ ته‌قينه‌وه‌ ئسپات ئه‌وه‌ ئه‌كا ك ئه‌گه‌ر جاريگتر ئه‌و حاڵه‌ته‌ بوينيم بيده‌نگى نيشان نايه‌يم و ئه‌كه‌فيمنه‌ جموجويل.