ئەو کوڕ هەرزە گیریا ک دزەکردە تویتەر و ترامپ خەڵەتان

شەفەق نیوز/ دویەکە جومعە، لە شار Tampa لە وەلایەت فلۆڕیدای ئەمریکی، دەسگیر Graham Ivan Clark  کوڕە هەرزەی ١٧ ساڵان ئەمریکی کریا، چوونکە کاریگ کرد هیچ کەس وەرجە  خوەی ئی ئازاییە نەیاشتگە، ک وەدەسمیەت چەن کەسیگ هاوتەمەن خوەی، دزەی فراوان و سەرسامبەریگ وەرجە دوو هەفتە بکەێد، چیە ناو ئەکاونتەگان لە تۆیتەر ک ماڵپەڕ وەناوبانگەیل لە خاوەن ملیارەگان بوی، و لە گشت چینەگان ناسریاگن، لەناویان باڕاک ئۆباما سەرۆک ئەمریکای وەرین و جۆ بایدن جیگرەگەی، و لەی داگیرکردنە ک تەنیا نیم ساعەت وەپی چگ، خوەی و برادەره‌یلی بایی ١٠٠ هەزار دۆلار قانجاز کردن، وەرانوەر پویل ''بیتکون'' ئەلیکتڕۆنی.

بانگەشەی گشتی لە کەرت Hillsborough لە فلۆریدا، لە بەیاننامەیگ وت: ئەوەسا جوور کەسیگ گەورا دادگایی کریەێد، وەرانوەر ٣٠ توومەت  و تاوان، و هەمیش دادگای فیدڕآڵی لە ولایەت کالیفۆڕنیا توومەتبار هەردوگ هاوبەشەگەی: ماسۆن شیبێرد بریتانی ١٩ ساڵان، و نیما فازڵی ئەمریکی ٢٢ ساڵان كرد، ک هیچ وەینەیگ لەبان ئەنتەرنێت نەیرن، بڵکم مەغزە وەڕێوبەرەگە خوەی گڕاهام دەسگیرکریاگە.

سێ دزەکەرەگەی تویتەر، توێنستن وەخەڵەتانن بڕ پویلیگ وەدەس بارن، ناوەیل ئەوانیەگ دزەیی کردنە ماڵپەڕەگانیان وەکارهاوردن، وتویت دروکانی نووسانن، هەرکەسی خوەنستەیان لە خوەیەو لە ماڵپەڕ ئۆباما سەرۆک ئەمریکای وەرینە، وهەمیش لە ماڵپەڕ جۆن بایدن جیگری، ونووسانن ''چوارشەمه‌ی خوەشیگ، ئەوسا بیتکوین ئەرا گشت چەودیرەیل ماڵپەڕەگە، وئەوانیەگ لەی ناونشان پۆستە ک لە خوارەو نووسیاگە بیتکۆنەگە رەوانە کریەێد''. وەی جوورە فرە لەلیان کەفتنە فاقەگە.

لە ماڵپەڕ وەناوبانگەگان ک دزە کریا ناویان، مایکڵ بلۆمبیرگ دامەزرێنەر کۆمپانیای Bloomberg بوی و عومدەی وەرین شار نیویۆرک، هەمیش Jeff Besos وەرپرس کۆمپانیای ئەمازۆن ئەرا فرووشتن لەری ئەنتەنێت، ئیجا بیل گیتس هاوبەش دامەزرێنەر کۆمپانیای مایکرۆسۆفت ئەمریکی، هەمیش Elon Musk   وەرپرس کۆمپانیای تسیلا ک ماشین کەهرەبایی دروس کەێد، و هەمیش ماڵپەڕ ووان بافت وەرپرس کۆمپانیای Berkshire Hathaway ئەرا پیشەسازی و بازرگانی.

هەمیش دزەگە رەسیە ماڵپەڕ Kanye West گۆرانی بێژ ''هیب هۆب'' ئەمریکی، و کیم کارداشیان هاوسەرەگەی، و ژمارەی گەورایگ لە دەوڵەمەن و وەناوبانگەگان.

دویای ئەوە ک کەفنە فاق ناونشان بیتکۆنەگە، مووڵەت ٣٠ خولەک دەنە هەرکەسیگ چەودیری ئی ماڵپەڕە کەێد پویلەگە وە بیتکۆن رەوانە بکەێد تا وەرانوەری وەدووقات وەری بگرێد، و چەن خولەکیگ پەیام پویلەگان رشیا بانیان، تا ئەوەنە کارەگە ئاشکراوە بوی، و تیرەیل تویتەر لە بۆڕسەگان داوەزیا، و تا دوو هەفتە شوون دزەکەرەیل بڕیاگەو، تا  دویەکە جمعە  یەک لە شوون یەک کەفتنە دەس FBI، و دویاتریان و بویچگتریان لە تەمەن، ئەو کلاڕک هەرزە بوی.