وە ڕێنمایی ترەمپ، هەواڵگری ئەمریکا مووڵەت ئەمنی بایدن هەڵدەوشنێدەو
شەفەق نیوز/ تولسی گابارد وەڕێوەبەر هەواڵگری نیشتمانی ئەمەریکا هەڵوەشانن مووڵەت ئەمنی جۆ بایدن سەرۆک وەرین ئەمریکا ڕاگەیان، و مۆڵەتی دەسڕەسین وە زانیاری نهێنی ئەرا بڕیگ کەسایەتی دیار ئیدارەی وەرین دەێد.
گابارد لە پۆستیگ لەبان پلاتفۆرم “X” نویسان: “وە فەرمان سەرۆک دۆناڵد ترەمپ، مووڵەت ئەمنی جۆ بایدن سەرۆک وەرین هەڵوەشانەو، و مووڵەت دەسڕەسین وە زانیارییە نهێنییەیل کامالا هاریس، هیلاری کلینتۆن، لیز چێنی، ئادەم کینزینگەر، فیۆنا هیڵ و ئەلێکساندەر ڤیندمان هەڵوەشانەو.
جی باسە کە کە ناو ئەو کەسایەتیەیلە لە پۆستەگەی گابراد باسکریانە یا لە ئیدارەی جۆ بایدن سەرۆک وەرین ئەمریکا وانە پیشکەش کەن، یا ڕەخنە لە دۆناڵد ترەمپ سەرۆک ئەمریکا گردنە.
ئەلیزابێس چێنی و ئادەم کینزینگەر: ئەوان ئەندام وەرین ئەنجومەن نوێنەرەیل ئەمریکا بوین، و وەناوبانگن وە ڕەخنەی وەردەوامیان لە سەرۆک دۆناڵد ترەمپ.
فیۆنا هیڵ: وەڕێوەبەر کاروبار ڕووسیا لە ئەنجومەن ئاسایشی نیشتمانی ئەمریکا، فیۆنا هیڵ وە پسپۆڕیگ پێشەنگ کاروبار ناودەوڵەتی دانرێد.
ئەلێکساندەر ڤیندمان: ئەفسەریگ خانەنشینکریای سوپای ئەمریکاس، وەرجەیە جویر وەڕێوەبەر لە ئەنجومەن ئاسایشی نیشتمانی کار کردگە و ڕۆڵیگ دیار لە لێکۆڵینەوەیل لێپێچینەوە لە ترەمپ داشتیە.
ئی بڕیارە دویای گامیگ وەرین ئیدارەی ترەمپ تیەێد ئەرا کیشانەوەی مووڵەت دەسڕەسین وە زانیارییە نهێنییەیل لە کامالا هاریس و هیلاری کلینتۆن و ئەندامەیل بنەماڵەی جۆ بایدن، گوایە پێشێلکاری یان پراکتیزەکردنە کە هاتی هەڕەشە لە ئاسایش نیشتمانی بکەێد.
وەرجەیە گابارد هەڵوەشانن مووڵەت بریکار هەواڵگری ڕاگەیان کە نامەی "زانیاری هەڵە"یا واژوو کردگە کە پەیوەندی وە لاپتۆپ هانتەر بایدنەو دیرێد. لە سەرەتای مانگ ئازار راگەیان کە وە رینمایی ترەمپ، مووڵەت دەسڕەسین وە زانیارییە نهێنییەیل ئەنتۆنی بلینکن وەزیر وەرین دەیشت ئەمریکا و جەیک سولیڤان یاریدەدەر وەرین سەرۆک ئەرا ئاسایش نیشتمانی هەڵوەشانەو.
لە ٧ شوبات، دۆناڵد ترەمپ، سەرۆک ویلایەتە یەکگرتگەیل ئەمریکا، وە دەسەواژەی "جۆ، تۆ لە کارەگەی دویرەو خەێد"، دەسنەڕین وە زانیارییە نهێنییەیل بایدن سنووردار کرد، یەیش ڕێگریی لەلی مرد کە بتوانێد دەسی بڕەسێد وە زانیارییە هەواڵگرییەیل رووژانە.
باو و ئاساییە کە سەرۆکەیل وەرین ئەمریکا زانیاری هەواڵگری وەربگرن تا ئەوەگ بتوانن ئامۆژگاری سەرۆکە دانیشتگەیل بکەن لەباوەت وە پرسەیل ئاسایش نیشتمانی و سیاسەتی دەیشتەو.
لە ساڵ ٢٠٢١ جۆ بایدن سەرۆک کۆمار ئەمریکا مووڵەت ئەمنیی ترەمپ هەڵوەشانەو کە ئەو وەختە سەرۆک ئەمریکا بوی، و پیت هێگسێتی وەزیر ەرگری ئەمریکاش مانگ گوزەشتە هوبردەکاری ئەمنی کەسی و ڕەزامەنی ئەمنی ژەنەڕاڵ خانەنشینکریای ژەنەڕاڵ مارک میلی، سەرۆک وەرین ئەرکان هاوبەش هەڵوەشانەو.
