وێنە.. دوو رۆژنامەوانی ئەفغانی باس شکەنجەی زیندانەیل تاڵیبان کەن
شەفەق نیوز/ دوو رۆژنامەوانی ئەفغانی، ئمڕوو پەنجشەممە، ئاشکرای ئەو شکەنجە کردن ک دویای دەسگیرکردنیان ئەرا چەن ساعەتیگ لەلایەن ئەندامەیل تاڵیبان کەفتنە وەری لەوەر تۆمارکردن ناڕەزایەتیەیل کابوڵ پایتەخت.
ئاژانس فرانس پرس باس کرد ک لە مەوقەی خۆپیشاندانەیل دوێەکە چوارشەممە، ئەو دوو پیاوە دەسگیر کریان ت وەرەو بنکەی پۆلیسیگ لە پایتەخەگە بردنەیان، و وتن؛ ک کەفتنە وەر گورمیچە و کوتەک وەشانن و وایەر کارەبا و قەمچی دویای توومەتکردنیان وە رێکخستن ناڕەزاییەگە.
ئاژاناسەگە لە زوان وێنەگر نعمەتولڵا نەقدی وت: یەکیگ لە ئەندامەیل تاڵیبان پای نادە بان سەرمە و وەخشتیگ دەموچەوم تلان، و مەزەنە کردم ئەوەسا کوشنەم، وتیش؛ ئەندامەیل تاڵیبان دەسگیر ئەو کەسەیلە کردن ک وە مۆبایلیان وێنە گردنە.
نەقدی وتیش؛ ئەندامەیل تاڵیبان خوازین کامیراگەم بڕفنن، باوجی توێنست بخەێدەی لای کەسیگ لە ناڕەزایلە، وەلی سێیان لە تاڵیبان دەسگیرم کردن و وەرەو بنکەی پۆلیس بردنەم و لەورا دەس وەشانن بوی.
وتیش؛ هەنای پرسیار دەربارەی هووکار ئەو دەسدریژیە لەلیان کرد وتن: تو خوەشبەختی ک سەرد نەوڕیمنە، وتیش؛ خریا بن ئاو زیندان قەرەباڵغی ت لەو بنە پەیای پەیامنێر تەقی دەریایی کرد ک ئەوەیش کەفتیەسە وەر دەسدریژیکردن.
لەلای خوەییش، دەریایی وت؛ ژان سەختیگ وەخوەمان دیمن ک توانای جوولەکردن نەیاشتیمن، ئەوانە وە چەو دوژمنایەتی وەپیمان نووڕن.
