وەماوەی ٣٥ ساعەت.. نۆهەم زەویلەرزە دەێد لە باشوور خوەرئاوای مەراکش لە مەغریب
2023-09-10T13:06:59+00:00
شەفەق نیوز/ ناوەند زەویلەرزەناسی ئەوروپای ناوڕاس، ئمڕوو یەکشەممە، توومارکردن زەویلەرزەیگ وەتونی ٤.٥ پلە لەبان پەیمانەی ریختەر راگەیان، وەدویری ٧٧ کێلومەتر وەرەو باشوور خوەرئاوای مەراکش، لە ساعەت ٩ شەوەکی.
ناوەندەگە وتیش؛ یە نۆهەم زەویلەرزەس کە وەماوەی ٣٥ ساعەت گوزەشتە دەێد لە مەغریب.
ناوەند جیوڵۆجی ئەمریکی وت: سەنتەر ئەو زەویلەرزە کە شەو جمعە لەبان شەممە داد لە مەغریب کەفێدە نزیکەی ٧٠ کێلومەتر وەرەو باشوور مەراکش.
وتیش؛ هاز زەویلەرزەگە رەسیە ٦.٨ پلە لەبان پەیمانەی ریختەر لە ساعەت ١١:١١ی شەو وە وەخت وڵاتەگە،
تەلەفزیۆن فەرمی لە زوان وەزارەت ناوخوەیی مەغریب وت: شمارەی قوربانیەیل زەویلەرزەگە رەسیە ٢٠١٢ کوشیان.
وتیش؛ شمارەی زەخمدارەیل رەسیە ٢٠٥٩ کەس.
