وەسێدارەدان دادوەریگ میسری ژن خوەی کوشتیە
شەفەق نیوز/ دادگای نەهیشتن تاوان جیزە لە وڵات میسر، ئمڕوو یەکشەممە، فەرمان وەسێدارەدان لەبان شوی خانمە راگەیانکار شەیما جەماڵ و هاوبەشەگەی لەبان تاوان کوشتن رکداری دەرکرد.
لێکۆڵینەوەیل دەرخستن ک ئەیمەن حەجاج یەکەمین توومەتبار، ک شوی قوربانیەگە بویە، پلان ئەرا کوشتنی نایە لەوەر ئەوە ک ژنەگە هەڕەشە دایە رسوای بکەێد، ک کاروباریگ بازرگانی داشتیە، و پۆست دادوەریی و جیگر سەرۆک ئەنجومەن دەوڵەت ری وەو کارەیلە نیەێد.
وەگورەی لێکۆڵینەوەیل؛ خانمە کوشیایەگە پویل وەرانوەر بیدەنگیی لە شویەگەی تواستیە، ک هیشتیە وە بەشداریکردن توومەتبار دویەم، حسێن غەرابلی بکوشێدەی.
هەمیش دەرکەفت ک دوو توومەتبارەگە بووسان دویریگ گردنەسە کرا، و تەرم ژنەگە لەناوی نانەسە خاک، ک هەردوگ توومەتبار چشتەیلیگ ئەرا چاڵ کەنین سەننە، و دەوانچەیگ وپارچەیگ پەڕوو ئەرا کوشتنی ئامادە کردنە، و زەنجیر و کەلەبچە ئەرا رەسانن تەرمەگە ئەرا قەورەگە دویای کوشتنی ئامادە کردنە، وهەمیش سوتەمەنی بردنە تا روخساری بشارنەو.
لەو رووژە ک ئەرا جیوەجیکردن پلانیان دیاری کردنە، توومەتبار یەکەم هاوردیەسەی بووسانەگە گوایە خوازێد بسینێدەی، و توومەتبار دویەم چەوڕی کەێد، ئیجا شویەگەی پەلاماری داگە و رمانیەسەی بان زەوی، و وە دەس وپەڕوو دەمی گردیەسە چنگ، و توومەتبار دویەم دەسوپای گردیە تا جویلە نەکەێد، تا گیانی لەدەسدایە، ئیچا تەرمەگەی وە زەنجیر بەسانە، و نانەسەی قەورەگە، و سوتەمەنی رشاننەسە بانی.
١٠ کەس لەو باوەتە جویر وەچەودیەیلیگ بوینە بەڵگەی تاوانەگە، یەکیگیان خاوەن ئەو دوکانە ک چشتەیل چاڵکەنین سووتەمەنی لەلی سەننە، وهەمیش قسەیل ودان توومەتبارەیل، وەگەرد ئەو لێکۆڵینەوەیەیلە ک هیشتن توومەتبار دویەم ناونشان قەورەگە ئاشکرا بکەێد، تا توومەتبار یەکەم دان وە تاوانەگەی نا.
