وەزارەت دەرەوەی سوریا: گورزەيل ئیسرائیل فرۆکەخانەی حەما ویرانکردنە و دەیان مەدەنی و سەربازی زەخمداربوی

شەفەق نیوز/ وەزارەت دەرەوەی سوریا شەو چوارشەممە لەبان پەنجشەممە، ئامار گورزەیل ئیسرائیلی راگەیان کە 5 ناوچەی جیاواز لە سەرانسەر وڵاتەگە گردیەسە ئامانج.

لە بەیاننامەگەی وتیش: :لە پێشلکاریەیل یاسای ناودەوڵەتی و سەروەری کۆمار عەرەبی سوریا، هێزەیل ئیسرائیلی گورزیگ ئاسمانی وەبان پەنج ناوچەی جیاواز لە گشت وڵاتەگە ئەنجامدا لەماوەی 30 خولەک، بویە مدوو رمیانن تا رادەیگ گشت فرۆکەخانەی سەربازی  حەما و زەخمداری دەیان مەدەنی و سەربازی".

وەزارەتەگە لە بەیاننامەیگ وتیش: "لەوەختیگ کە سوریا دویای 14 ساڵ لە جەنگ تەقەلای نووەوکردن دەێد، پەلامارەیل دوارەوبوی ئیسرائیل ئاشکراس ئەرا دوارە گلەوداین تونوتیژیە لەناو وڵاتەگە، تەقەلای خاسەوکردن وڵاتەگە تێک دەێد وەگەردیا  سیاسەت بی سزایی  وەردەوام کەێد".

سوریا لە کۆمەڵەی ناودەوڵەتی داواکەێد رێکار وەربگرن پشتیوانی بکەن و فیشار بخەن وەبان ئیسرائیل ئەرا وسانن جەنگ و پابەندبوین وە یاسای ناودەوڵەتی و پەیمانەیلی وەپای رێکەفتن وەرز هێزە گشتیەیلل ساڵ 1974.