وەگەرد بمبارانکردن ئیدلیب و حەلەب.. سوپای سوریا وە گەپترین کاروان سەربازی چوودە ناو لادیەی حەما
شەفەق نیوز/ سوپای سوریا، ئمڕوو چوارشەممە، رەسین کەپترین کاروان سەربازی ئەرا ناو لادیەی حەما راگەیان ئەرا پاڵپشتیکردن هیزەیل بان سەنگەر و قایمکردن دەورگرد فەرماندەیی فیرقەی ٢٥ و شار حەما وە تەواوی.
ئەوەیش وەگەرد بمبارانکردن سەختیگ وەلایەن سوپای سوریا تیەێد وەبان لادیەیل ئیدلیب و حەلەب وە پشتگیریکردن ئاسمانی رووسیا.
سوپای سوریا وتیش: ئەو تەقینەوەیلە لە حمس لەوەر گورزەیل چەک ئاسمانی سوری و ڕوسی بوی.
وەگورەی ئاژانس خەوەری سوریا، سوپای سوریا وەرگریەیلی لەبان سنوور باکوور خوەرئاوای پارێزگای حەما قایم کرد، کە کەفتیەسە ناو جەنگ وەرد باڵەیل چەکدار.
جەنگەیل لادیەی حەما
وەگورەی روانگەی ماف مرۆڤ سوریا، باڵە چەکدارەیل وە فەرماندەیی دەسەی ئازادکرن شام (بەرەی نوسەری وەرین) دەسنانە بان ١٨ ئاوای و ناوچە لە لادیەی حەما ناوڕاس وڵات، تا وە ٦ کیلۆمەتر بکەفێدە نزیک شار حەما.
لەناو ئەو ئاوای و ناوچەیلە کە باڵەیل چەکدار دەسنانە بانیان، ئاوایەیل ئەبو لەفە و مستەریحە و بیوز و سروەت رهجان و سرحای باکوور و سرحای باشوور وەگەرد ناوچەی معرشحور ستراتیژی لە کەنار شارەگە.
باڵە چەکدارەیل لە سێ شوینەو وەرەو شار حەما وەرەو نوا چن، کە ٦ کیلۆمەتر لە شارەگەو دویرن.
