وە دەسمیەتی حووسییەیل.. رووسیا سەدان یەمەنی کەێدە سەرباز ئەرا جەنگ ئۆکرانیا
شەفەق نیوز/ راپۆرتیگ لەلایەن رووژنامەی "فاينانشياڵ تايمز" بەریتانی، ئمڕوو دووشەممەر ئاشکرا کرد کە رووسیا پیاوەیلیگ لە یەمەن کردیەسە سەرباز ئەرا جەنگ ئۆکرانیا کلیان بکەێد، ئەوەیش وە دەسمیەتی حووسییەیل.
راپۆرتەگە لە زوان کەسەیلیگ ئاگادار وتیش: سوپای رووسیا توەنست سەدان لە پیاوەیل یەمەن بکەێدە سەرباز وە کار قاچاخی نادیاریگ.
رووژنامەگە وتیش؛ بەشیگ لەو پیاوەیلە پەیمان وەپییان دریا پۆست فەرمانبەری وە مووچەی بەرز و دەرفەت وەرگردن ڕەگەزنامەی رووسی بکەفێدە دەسیان، وەلێ هەناێ رەسینە رووسیا ناچار کریان جەنگ بکەن و زویوەزوی ئەرا بەرەی جەنگ لە ئۆکرانیا کلیان کریا.
رووژنامەگە دیاری کرد کە ئەو کارە لە یەمەن وەلایەن کۆمپانیایگ وەڕیەو چگ کە کابرایگ سیاسی حووسی ناودیار دروسی کردگە.
وتیش: گریەبەسی سەربازکردن وەدەس هاورد و لە مانگ یۆلیۆلی گوزەشتەو دەسوەپی کردگە.
لەوەر ئەو زەرەدەیل گەورە کە رەسیە سوپای رووسیا لە ئەنجام لەشکرکیشی وەردەوامی ئەرا ئۆکرانیا، مۆسکۆ لەی دویاییە نزیکەی ١٠ هەزار سەرباز کۆریای باکووری خستە ناو سوپاگەی.
رووژنامەگە وتیش: ئی هاوکاریە نشانەس ئەرا قویلکردن پەیوەندییەیل ناوەین کرملین و حووسییەیل.
وتیش: نۆینەرەیلیگ لە مۆسکۆ سەردان یەمەن کردنە ئەرا دانوسەنین.
