وەخشین عراقیەیل لە وەرگردن فیزا ئەرا لوبنان
2022-09-10T12:49:21+00:00
شەفەق نیوز/ ئەنجومەن
وەزیرەیل لوبنان، ئمڕوو شەممە، بڕیار وەخشین عراقیەیل لە وەرگردن فیزای وەناوهاتن دا.
حکومەت لوبنان لە بەیاننامەیگ ئاژانس شەفەق نیوز نووڕیەی وت: وە ئامانج گورجکردن هاوکاری وەرد کۆمار عراق، ئەنجومەن وەزیرەیل رەزامەنی لە داوای وەزیر ناوخۆ و شارەوانیەیل دا وە وەخشین عریاقیەیل لە وەرگردن فیزا ئەرا هاتنیان ئەرا ناو خاک لوبنان.
وتیش: ئەنجومەن وەزیرەیل لوبنان، بڕیاریگ دەرکرد ک فیزا و نیشتەجیبوین موفت تا ماوەی یەک مانگ بیەێدە ئەو عراقیەیلە ک خوازن بانە ناو لوبنان و ری ئەرا درویژکردنی تا سێ مانگیش هەس ئەرا ئەوانەگ وەخاتر گەشتیاری هاتنە، وهەمیش ناو عراق لەو مادە سڕیاوە ک بایەتە دوو هەزار دۆلار ئەمریکی کاش وەپیان بوود یا چەکیگ لە بانکیگ ناسیاگ داشتوون، جویر مەرجیگ سەرەکی ئەرا هاتن وەناو خاک لوبنان، ئەوەیش دویای نووڕین میشال عۆن سەرۆک کۆمار و رەزامەنیی.
