“وەکارهاوردن خاک عراق“ ئیران پلان پەلاماریگ “سەخت و ئاڵووز” وەبان ئیسرائیل وە بەشداریی سوپا دانەێد
شەفەق نیوز/ راپۆرتەیل ئەمریکی، ئمڕوو دووشەممە، ئاشکرا کردن کە ئبران ئاگادار وڵاتەیلیگ عەرەبی کردیە لە نیاز ئەنجامدان پەلاماریگ "سەخت و ئاڵووز" وەبان ئیسرائیل، ئەوەیش لە وەڵام پەلامارەگەی ئی دویایی ئیسرائیلە کە بویە مدوو کوشیان 4 سەرباز ئیرانی و هاوڵاتییگ مەدەنی .
وەگورەی روزژنامەی "وۆڵ ستریت جۆرناڵ" ئەمریکی، پلان وەڵامدان ئیران وەبان ئیسرائیل، سەر جەنگی هازدارترەک و چەکیگ ترەک هاناوی و هاتێ دامەزراوە سەربازییەیل ئیسرائیل وە شیوەیگ سەختتر لە گوزەشتە بکەێدە ئامانج.
رووژنامەی وۆڵ ستریت جۆرناڵ لە زوان وەرپرسیگ ئیرانی بڵاو کرد کە وەڵامدان ئیسرائیل دویای رووژ دەنگدان لە هەڵوژاردن ئەمریکا تیەێد، بەڵام وەرجە دەسوبەکاربوین سەرۆک کۆمار نوو.
کاروەدەسەیل ئیرانی و عەرەبی باس ئەوە کردنە کە ئیران دیپلۆماتکارە عەرەبییەیل ئاگادار کردگە کە سوپای ئاسایی خوەی بەشداری لە وەڵامدانەگە کەێد، چوینکە لە پەلامارەگەی ئیسرائیل ٤ سەرباز و هاوڵاتییگ مەدەنی کوشیانە.
بەڵام بەشداریکردن ئیران لە سوپای ئاسایی خوەی وە واتەی جیگیرکردن هیزەیلی نییە، بەڵکم وە واتەی ئەوە رەسنێد کە سوپای پاسداران کە نیمچە سەربازییە و وفرەیی رەفتار وەرد باوەتە ئەمنییەیل ئیسرائیل کەێد، لەی جویرە وە تەنیا رەفتار نیەکەێد.
وەرپرسیگ میسری وتیە کە ئیران وە تایبەتی هوشداری داگە لە وەڵامدان "سەخت و ئاڵووز".
وەرپرسیگ ئیرانی وتیە: سوپاگەمان خەڵک لەدەسداگە، ئەراوە بایەسە وەڵام بیەیمنەو، وتیش: هاتێ ئیران خاک عراق جویر بەشیگ لە ئۆپەراسیۆنەگە وەکار بارێد و شایەت دامەزراوە سەربازییەیل ئیسرائیل بکەێدە ئامانج، “بەڵام وە شیوەیگ سەختتر لە جار وەرین”.
وەگورەی ڕاپۆرت رووژنامەی وۆڵ ستریت جۆرناڵ، کاروەدەسەیل میسر، بەحرەین و عومان وتنە کە دیپلۆماتکارەیل ئیرانی ئی کڕ فراوانە لە وەڵامدانیگ خستنەسەڕوی دویای هوشدارییەیل ئەمریکا، چ گشتی بوود یا تایبەت، لە وەرانوەر بەشداریکردن لە وەڵامدان ئیسرائیل.
رووژ جمعە، یەکیگ لە ژەنەڕاڵەیل باڵای ئیران هەڕەشەی "وەڵامدانیگ وە خەیاڵ ناێد" کرد، لە وەختیگ عەلی خامەنەئی ریبەر باڵای شووڕش ئیسلامیی ئیران، رووژ شەممە هوشداری دا لە "وەڵامیگ دگان شکن".
دویەکە یەکشەممە، مەسعوود پزیشکیان، سەرۆککۆمار ئیران راگەیان؛ وڵاتەگەی نیەتوەنێد بیلێد پەلاماریگ ئیسرائیل وەبی وەڵام رەد بوود.
بەڵام پزیشکیان باس ئەوە کرد کە ئیران هیمان باس چوینیەتی وەڵامدان کەێد، وتیش؛ ئەگەر ئاگربەس لە غەززە و لوبنان بوود، هاتێ شیوە و خەسی وەڵامدان ئیمەیش ئاڵشت بوود.
