هه‌وڵ خوه‌يكوشى له‌ناونى په‌نابه‌ره‌يل له ئه‌ڵمانيا فيشتره‌و بويه
شه‌فه‌ق نيوز/ رووژنامه‌ى "ئوسنابروكر تسايتونغ" ئه‌ڵمانى له راپۆرتيگى باس له زيايبوين فريه‌يگ هه‌وڵه‌يل خوه‌يكوشى كرد له ناونى په‌نابه‌ره‌يل له ولايه‌ت ساكسۆنياێ خوارگ.
رووژنامه‌گه له راپۆرته‌گه‌ێ پشت وه جواوه‌يل حكومه‌ت ولايه‌ته‌گه كرد له پرسيارێ ئه‌را فراكسيۆن خزب ديموكرات ئازاد له بارى هه‌وڵه‌يل خوه‌يكوشى له‌لايه‌ن په‌نابه‌ره‌يله‌و له‌و ولايه‌ته وه ئه‌وه‌گ ساڵ گوزه‌يشت ده‌يان هه‌وڵ خوه‌يكوشى ئه‌نجام درياگه‌و 4 له‌ليان وه مردن كووتايى هاتگه، يه‌يش له وه‌ختيگ ساڵ 2015 ته‌نيا 19 حاڵه‌ت بويه‌و له‌ساڵ 2016 ره‌سيه‌سه 162 حاڵه‌ت.
جى باسه، وزاره‌ت ناوخوه‌يى له ولايه‌ت ناوبرياگ وت: هووكار زيايبوين فريه‌يگ هه‌وڵه‌يل خوه‌يكوشى له ئاكسۆنياێ خوارگ ئه‌چێده‌و ئه‌را بار ده‌روينى و قه‌يرانه‌يل ده‌روينى ك په‌نابه‌ره‌يل له‌و ولايه‌ته وه‌ده‌سيه‌و ناڵنن وه‌ل خه‌موكى و وه‌كارهاوردن حه‌پ و مادده‌يل بيهووشكه‌ر و نائوميدى وه بوونه‌ى ره‌ته‌وكردن ماف په‌نابه‌رييان ك له‌يوا له‌ليان ئه‌كا خوه‌يكوشى هه‌ڵوژنن.
