هەڵپووقیان گڕکانیگ لە ئەندەنوسیا گەشتە ناودەوڵەتییەیل وسنێد
شەفەق نیوز/ چەن کۆمپانیایگ فڕۆکەوانی ناودەوڵەتی گەشتەیلیان ئەرا دورگەی گەشتیاری بالی ئەندەنوسیا هەڵوەشانەو، یەیش دویای ئەوەگ دووارە هەڵپووقیان گڕکانیگ ئەور خوەڵەکوو وەرەو بەرزی ١٠ کیلۆمەتر وەشان، و هەزاران کەسی ناچارکرد ناوچەیلیان چووڵ بکەن.
جێتستار و قانتاس، ئمڕوو چوارشەممە، راگەیانن کە گەشتەیلیان ئەرا بالی وسانن، ئەرا بیوەیی لەوەر خوەڵەکوو گڕکان کە لە ئەنجام هەڵپووقیان گڕکان لاکی لاکییەو دروسبویە، لەوەختیگ ماڵپەڕ وەدویاچگن فڕۆکەیل “Flight Radar 24” هەڵوەشیان کاروانەیل هەردوگ کۆمپانیای “ئایەر ئاسیا” و ”ڤێرجن” نشان دا.
کۆمپانیای جێتستار ئوسترالی، ئمڕوو چوارشەممە، راگەیان "لەوەر خوەڵەکوو گڕکان کویەی لیتوپی لە ئەندەنوسیا، ئیرنگە بیوەی نییە ئەرا چگن وەرەو بالی و گلەوخواردن لە بالی"، وتیش: لە نزیکەو چەودیاریکردن رەوشەگە کەن و هەگ خاسترەو بوی دەسوە کاروانەیل کەن.
وەگورەی ڕاپۆرت سکای نیوز، کاروانیگ فڕۆکەخانەی قانتاس، کە وەرەو ئوسترالیا چیاد، لەوەر خوەڵەکوو ناچاربویە لە ناوەڕاس ریەگە گلەو بخوەێد.
بالی گرنگترین شوین گەشتیارییە لە ئەندەنوسیا وەتایبەت ئەرا گەشتیارەیل ئوسترالی.
