"هەسەدە و مەسەدە" شەرمەزار پەلامارەیل وەبان سوەیدا کەن

شەفەق نيوز- دیمەشق/سوەیدا

ئمڕوو دووشەممە، هیزەیل سوریای دیموکرات و ئەنجومەن سوریای دیموکرات وە تونی نەفرەت لەو پەلامارەیل دووارەبویە کردن کە ئاوای و ناوچەیل پارێزگای سوەیدا کەنە ئامانج، کە لەوەر ئەوە شمارەیگ هاوڵاتی مەدەنی گیانیان لەدەسدانە، بیجگە سزانن و تاڵانکردن دەیان ماڵ و باخ.

لە بەیاننامەیگ کە رەسیە ئاژانس شەفەق نیوز، هیزەیل پاراستن گەل "شەرمەزارکردن ئەو پەلامارەیل و هەراسانەیلە وەبان خەڵک سوەید" کرد، دووپاتیش لەوە کرد کە "ئی کارەیلە شکست نوویگە ئەرا ئومید سورییەیل". داوای " وسانن کوتپڕ ئی پەلامارەیلە کرد و دروسکردنی زەمینەیگ ئەرا دەسپیشخەرییە نیشتمانییەیل ئەرا پەیاکردن چارەسەرییگ کە وەگەرد خواستەیل گشت پێکهاتەیل گەل سوریا بگونجێد".

لەلای خوەیەو ئەنجومەن سوریای دیموکرات "نیگەرانی قویلی لە پیشهاتەیل سوەیدا" نشان دا، وە لەوەرچەوگردن ئەوە کە "ئەوەگ رویدەێد هەڕەشەی ڕاستەوخۆ وەبان ئاشتی مەدەنی و یەکێتی نیشتمانی لە وڵاتەگە دروس کەێد".

وتیش: "نیەتوانریەێد پەرەسەنین تونوتیژی لە شکست چارەسەرە سیاسییەیل و وەردەوامی رێباز ئەمنی لەلایەن حکومەت سوریاو جیاوە بکریەێد". ئەو توخمەیل ناو ئامێر حکومەت توومەتبار کرد وە "رۆڵیگ ڕاستەوخۆ دیرن لە هیزدان جەنگ، و وەرپرسیاریەتی حکومەت لە گەنتربوین قەیرانەیل"، هوشداریشیدا کە "رۆڵیگ لەو جویرە وەگەرد ئەرک دەوڵەت نەپووڕیاس وەرد مقیەتیکردن هاوڵاتیەیلی".

هەرلیوا ئەنجومەنەگە هوشداریدا لە "رخداری قسەکردن و خوسە و کینەی تائیفی کە وەگەرد رویداوەیلەو دیارن"، داوای "دویرکەفتن لەی لیژی رخدارە کرد و زوان گفتوگۆ لەبان پەنابردن وە چەک زاڵ بوود". و "پابەندبوین خوەی بە گفتوگۆ ناوەین سوریا و رەتکردن تونوتیژی و خوازین کردەوەی وەکۆمەڵ ئەرا قۆناغیگ نوو لە سوریا لە بنەمای ئاشتەوایی و فرەیی و دادپەروەری" دووپاتکرد.

جەنگ و ناوەین هووزەیل سوننە و چەکدارەیل کەمینەی دروزەبل لە شار سوەیدا لە سوریا رویداوەگە، و وەزارەت ناوخۆی سوریا بڵاو کرد کە لەلای کەمەو 30 کەس کوشیانە، و روانگەی سوریا ئەرا ماف مرۆڤیش راگەیان سمارەی کوشیاگەیل رەسیەسە 37 کەس.