نوێنه‌ر ترامپ سه‌ردان چوار دوڵه‌ت عه‌ره‌بى ئه‌كا
شه‌فه‌ق نيوز/ وه‌رپرسيگ باڵا له ئداره‌ى ئه‌مريكى جه‌خت له‌وه كرد ك جاريد كوشنه‌ر و جيسون گريتبلات هه‌ردوگ كلكرياێ دوناڵد ترامپ سه‌رۆك ئه‌مريكى ئه‌را خوه‌رهه‌ڵات ناوين، سه‌ردان ئوردن و قه‌ته‌ر ئه‌كه‌ن له‌چوارچێوه‌ى گه‌شت ئاينده‌يان.
له‌ى باوه‌ته‌و، زويتريش راپۆرته‌يل رووژنامه‌گه‌رێ باس له‌وه كردن گه‌شت كوشنه‌ر ك زاواى ترامپه‌و گه‌ورا روێژكاره‌يليه و گرينبلات كلكرياێ ماڵ چه‌رمگ ئه‌را ئاشتى له خوه‌رهه‌ڵات ناوين سعوديه‌و مسر و ئسرائيل ئه‌گرێده‌و.
ئه‌و وه‌رپرسه ك نه‌تواس ناوێ ئاشكرا بدێ، له باسيگ ئه‌را ماڵپه‌ڕ "تايمز ئۆف ئسرائيل" باس له‌وه كرد ك ماڵ چه‌رمگ باوه‌رێ ئه‌وه‌سه ده‌رفه‌تيگ هه‌س له‌ى گه‌شته ئه‌را تاوتوێكردن بارودوخ له كه‌رت غه‌ززه‌و قوناغه‌يل ئاينده له‌وه‌ر جيوه‌جيكردن ئاشتى له‌ناونى ئسرائيليه‌يل و فلستينيه‌يل و هه‌ميش گووشگرتن له هه‌ڵويست سه‌ركرده‌يل هه‌رێمى له‌باره‌ێ بڕيگ مه‌سه‌له‌ى تايبه‌ت وه پلان ئاشتى له خاكه‌يل فلستينى ك له‌لايه‌ن ماڵ چه‌رمگه‌و ئاماده ئه‌كريه‌ێد.
جى باسه، هێمان وه‌خت ئى گه‌شته ديارى نه‌كرياگه، وه‌لێ جوور ئه‌وه‌گ ئاشكراس هه‌ردوگ نوێنه‌ر ترامپ له 22 يا 23 ئى مانگه ئه‌ڕه‌سنه ئسرائيل.
