ناسا شمارەی ئەو هەسارەیل دەێشت کۆمەڵەی خوەر ئاشکرا کەێد
شەفەق نیوز/ ئاژانس بۆشایی ئاسمان ئەمریک “ناسا” ئاشکەرا کرد، تا ئیسە زیاتر لە پەنج هەزار هەسارە لە دەێشت کۆمەڵەی خوەر پەیا کریایە کە هەریەکەیان خاوەن تایبەتمەنی خوەیە.
ئاژانس ناسا لەدۊایین ڕاپۆرتی ڕاگەیانیە، تۊنستنە 65 هەسارەیتر لەدەیشت سیستم خوەر پەیابکەن و زیادی بکەن ئەرا شمارەی ئەو هەسارەیلە ک تا ئیسە وە تەواوی وە دڵنیایی تەواو پەیا کریانە و ڕزبەنی ئەرایان کریایە، وەگەرد یەیش جەم هەسارەیل پەیاکریاگ دەیشت سیستم خوەر رەسیە 5005 هەسارە.
وتیش؛" ئی هەسارەیلە ک تائیسە پەیاکریانە شمارەی کەمیگن لە ملیارەیل هەسارە ک لە کاکێشان و کۆمەڵە ئاسارەیلتر هەس".
باس لە تایبەتمەندیەیل هەسارەیلە کریایە ک، رۊپووشی جۊر سەنگ زەۊیە وەگەردیا قەوارەی گەپیگ لە گازەیلە ها ناوی ک وە چەندینجار گەپترە لە موشتەری، وە گشتی وە دەور دو ئاسارە خڕخوەن، بڕیگیانیش وە دەور ئاسارەیگ مردی گەردن.
ئەلیکساندەر لیشانز پسپۆڕ هەسارەیلە لە زانکۆی پەنسلڤانیا و بەشدار لە پرۆژەگەی ناسا راگەیان، “ئیمە دەسکردیمنە وە سەردەمیگ نوو ئەرا پەیاکردن هەسارەیلە تا زیادی بکەێمن ئەرا لیست هەسارە پەیاکریاگەیل، رەسین مانگ دەسکرد TEES ئەرا پەیاکردن هەسارەیل ک لە ساڵ 2018 کلکریا هەسارەی فرەتر و نوو لە دەێشت سیستەم خوەر ئاشکەرا کەێد".
