ناسا ئاهەنگ سەرکەفتنی وە تەکاندان نیمچە ئەسارەیگ کەێد روی وەرەو زەوی کردیە
شەفەق نیوز/ ئاژانس بۆشایی ئاسمان ئەمریکی (ناسا)، ئمڕوو سێشەممە، لە پەسەنکردن یەکەمین سیستەم وەرگری ئەسارەیی و تەقەلای دەڵەکداین نیمچە ئەسارەیگ سەرکەفت، هەنای کەشتی ئاسمانی (دارت) دالە نیمچە ئەسارەگە، و تەقەلا دا دویری لە زەوی بخەێد، و وەرپرسەیل ئاژانسەگە ئاهەنگ وە سەرکەفتن ئی تاقیە کردن.
ئاژانس رۆیتەرز وت: (دارت) وە سەرکەفتن دالە نیمچە ئەسارەگە، وە تونی ئەوبان دەنگ، لە یەکەمین تاقیکردن وەرگری نیمچە ئەسارەیی لە جەهان، ک ئەرا نواگردن نیمچە ئەسارەیگ دروس کریایە، هەنای روی وەرەو زەوی کردیە، وئەگەر ئەو نەیزەکە بڕەسێدە زەوی کارەسات گەورەیگ دروس کەێد.
لە پەخشیگ زنی، یەکەمین تەقەلای ئایم ئەرا ئاڵشتکردن ری نیمچە ئەسارەیگ لەلایەن ناسا لەبان ئەنتەرنێت دەرکەفت، ک لە ناوەند ئۆپراسیۆنەیل گرنگ لە تاقیگەی فیزیایی لە زانکۆی جۆنز هۆبکینز لە لۆریل لە ویلایەت ماریلاند پەخش کریا، ئەوەیش دویای دە مانگ لە وەشانن کەشتی ئاسمانی (دارت).
گرتەیل پەخشە زنیەگە، نشان لەیەکدان کەشتیەکە وەرد نیمچە ئەسارەگە (دایمورفۆس) دا، وەدویری ١١ مەلیۆن کیلومەتر لە زەوی.
ئامانج ئی ئەرکە ئەوە بوی ک ئایا ئەو کەشتی ئاسمانیە توانای دەڵەکدان نیمچە ئەسارەگە دیرێد تا رویکردنی وەرەو زەوی ئاڵشت بکەێد، وبیلێدەی روی وەرەو شوینیگتر بکەێد، و دویری لە زەوی بخەێد، یەیشە لە مانگ ئایندە دیار دەێد هەنای نووڕنە ئەو نیمچە ئەسارە تا بزانن دویای ئی تەقەلا روی وەرەو کوو کرد، باوجی وەرپرسەیل ناسا دەسخوەشی لە ئەنجام کوتپڕ ئەو تاقیە کردن، و وتن کەشتیە ئاسمانیەگە رەسیە ئامانج خوەی.
