چەن مانگیگ زیڕە خستە وڵات.. پولیس فەرەنسا رخبەرترین زاڕوو دەسگیر کەێد
پولیس فەرەنسا ئەو کوڕە تەمەن ١٣ ساڵە دەسگیر کرد کە ئویشن زەرپرسیارە لە کلکردن سەدان هەڕەشەی بومبی کە فەرەنس لە پاییزوو خستەیەسە بان ئاو و ئاگر.
وەگورەی نویسینگەی داواکاری گشتی ڕێنس و رووژنامەی لۆ پاریسیان، لێکۆڵینەوەیگ واز کریاس ئەرا دیاریکردن پەیوەندی ئەو هەرزەکارە وە زنجیرەیگ کە لەلای کەمەو ٣٨٠ هەڕەشەی بومبی ساختە لەناویان بوی.
رووژنامەگە وتیش: ئەو کوڕە گومان لەلی کریەێد لە سەرتاسەر فەرەنسا هەڕەشەی بومبی کردیە، وەتایبەتی لە فڕۆکەخانە و دادگا و زانکۆیل.
نویسینگەگە دیاری کرد کە کوڕەگە دان وەوە ناگە کە ئەرا "خوەشی" و بەبی هویچ مەبەستیگ سیاسی و ئایینی ڕی کارە کردیە.
رووژنامەی ئۆست فرانس نویساس ئەو خوەنەوارە تەمەن ١٣ ساڵە کە ئیسە لە بەندیکردنە، تویش بیمارییگ کەسایەتی بویە و وەرجەیە ڕێوشوێن خوەنەوارەی یەک ساڵە وەرگرتیە.
پولیس سەرەتا تەواوی خیزان کوڕەگە دەسوەسەر کرد، بەڵام دویاتر ئازاد کریان.
شەپۆلیگ هەڕەشەی بومبی ساختە لە پاییز ساڵی گوزەشتە گرفتیگ لە فەرەنسا دروسکرد، کە ئەوەی دەسەڵاتدارەیل نەتوەنستن هەڕەشەیل پۆلێن بکەن.
ئی هەڕەشەیلە دویای پەلاماریگ کوشندە لە ئۆکتۆبەر ٢٠٢٣ دەسوەپی کرد کە لەلایەن گەنجیگ لەبان مامووستایگ لە باکوور فەرەنسا ئەنجامدریا.
هویچ وەختیگ هەڕەشەیگ لە پشتینەی سیاسی دیاریکریای دەسنیشان نەکریغس و لە فرە جاریش دەسەڵاتدارەیل وتنە تاوانبارەیل گەنجن.
هەڕەشەیل فڕۆکەخانەیل پەک خستن، جاروباریش تا چەن رووژیگ لە دویای یەک، کۆشک ڤێرسای کە شوینیگ گەشتیارییە، چەن جاریگ کاریگەری لەبانی بویە.
