کۆنگرێس ئەمریکا داوا لە تیک تۆک کەێد پەیوەندیی وەرد چین بووڕێد
جۆ بایدن سەرۆکی ئەمریکا راگەیان کە واژوو لەبان ئەو دەقە کەێد کە چەن رووژیگ گوزەشتە لەلایەن ئەنجومەن نوێنەرانەو پەسەن کریاس.
هووشداریی یاسادانەرەیل ئەمریکا ئەرا تووڕ سۆشیال میدیای فرە ناودیار کەفێدە چوارچیوەی چەپگ فرەیگ لە دەق کە وەتایبەتی پیشکەشکردن هاوکاری ئەرا ئۆکرانیا و ئیسرائیل و تایوان لەخوەی گرێد.
سەرۆک دیموکراتەیل کە لە دەنگدان مانگ نۆڤەمبەر ئەرا خول دویەم کاندید کریاوێد لە سەرەتای مانگ نیسان لە ناو گفتوگۆی وەرد هاوتا چینییەگەی شی جینپینگ، "نیگەرانی" خوەی لەباوەت تیک تۆک نشان دا.
تووڕە وەناوبانگەگەی سۆشیال میدیا ڕاستەوخۆ دویای دەنگدانەگە لە ئەنجومەن نوێنەرەیل رووژ شەممە ناڕەزایەتی نشان دا کە وت قەیەغەکردن تیک تۆک "بوودە پێشێلکردن ئازادی رادەربڕین" ١٧٠ ملیۆن ئەمریکی.
ئەگەر دەقەگە بچووکە بوار جیوەجیکردنەو، بایتدانس کۆمپانیای باوگ چینی تیک تۆک ناچار کەێد لە ماوەی ١٢ مانگ ئەپڵیکەیشنەگە بفرووشێد، وە پێچەوانەوە لە فروزشگایل ئەپڵ و گووگڵ لەناو خاک ئەمریکا دویر خریەێد، بەڵام قەیەغەکردن خەێدەی ئەگەر وەنواکەفتن دەسەڵات دادوەری.
